Nagdungan og pabakuna sila si Mayor Michael Rama ug Bise Mayor Raymond Alvin Garcia atol sa paglusad sa bivalent Covid-19 vaccination sa dakbayan sa Sugbo, Hunyo 26, 2023.
Ang duha ka dagkong mga opisyal sa dakbayan sa Sugbo ningtambong sa gipatawag nga kalihukan ni Dr. Potenciano “Yong” Larrazabal sa medical arts sa Cebu Doctor’s University Hospital (CDUH).
Si Rama, atol sa iyang pagpamulong atubangan sa medical frontliners sa CDUH, nagpasalamat sa Ginuo nga taliwala sa iyang gihulagway nga ‘medical challenge’, hangtod karon pabilin nga himsog ang panglawas ug dili na siya gusto nga masubli kini nga sakit nga nikutlo sa kapin 1,700 ka mga kinabuhi sa dakbayan.
Ang bivalent Covid-19 vaccinations mao ang hiniusang pagpamakuna aron mabatukan ang maong virus, kansang vaccination gibalik na sa public ug private hospitals.
Si Dr. Jeffrey Ibones, assistant department head sa Cebu City Health Department ug Dr. Peter Mancao, medical director sa Cebu City Medical Center, nagkanayon nga pito ka mga tambalanan sa Cebu City ang niabli sa ilang ganghaan aron libre nga makapabakuna.
Si Ibones nagkanayon nga nagsugod na og pamakuna mao ang Chong Hua, CCMC, Vicente Sotto Memorial Medical Center, CDUH, St. Vincent Hospital ug Camp Lapu-Lapu sa Barangay Apas.
Sa umaabot nga mga adlaw, magsugod na usab ang Velez General Hospital, Perpetual Soccour Hospital, Visayas Community Medical Center, Southwestern University Phinma, Miller Hospital, Saint Anthony Mother and Child Hospital, Philippine National Police ug Ace Medical Center.
Ang priority sa maong pagpamakuna mao ang frontliners ug senior citizens.
Lakip sa nagpabakuna dungan nilang Rama ug Garcia mao silang Larrazabal, Mancao, Dr. Daisy Villa, Dr. Pek Eng-Lim sa Emergency Rescue Unit Foundation (ERUF) ug mga opisyal sa DOH 7.