Modus operandi sa grupo sa mga batan-on nga magrambol aron makahigayon og pagpangawat labina sa cellphone.
Usa kini sa nasayran human sa panagtagbo sa mga tag-iya og imnanan uban sa mga opisyal sa Barangay Kasambagan nga gipangulohan ni Brgy. Kapitan Franklyn Ong nga gipatawag sa Cebu City Police Office (CCPO) nunot sa lamok-lamok nga nahitabo sa Sityo Panagdait sa miaging semana.
Si Police Lieutenant Colonel Wilbert Parilla, deputy city director for operations sa CCPO, nibutyag nga atol sa tigom ug sa ilang imbestigasyon, usa lang ka higayon ang insidente sa kagubot sa Panagdait.
Dugang ni Parilla, dunay nag-post sa social media sa laing adlaw nga maoy hinungdan nga nagtuo ang publiko nga laing insidente sa kagubot na usab ang nahitabo.
Apan gitug-an ni Parilla nga modus lang sa mga batan-on ang maghimo og kagubot sanglit sila ra kini nga barkada ug kon dunay moduol unya mouwang sa ilang hinimohimo nga away, usa sa ilang kauban mokuha sa cellular phone niini.
“Dili gyud ni siya kanang kagubot. Modus of the minors nga magkagubot sila and then kon duna may moapil nga mga tawo, kanang ilaha sad panguhaon ang cellphone. Murag modus sa tiempo ba ilang bulabogon ang tawo aron moduol lipaton nila nya naay mokuha sad sa cellphone,” matod ni Parilla.
Nasabotan atol sa tigom nga kinahanglan nga magbutang na og security guards ang mga imnanan aron mobadlong sa mga menor de edad nga mosud sa mga establisemento.
Si Parilla niingon nga kasagaran sa mga batan-on dili mosulod sa imnanan apan mag-estambay sa gawas ug kon modagsa na ang mga tawo, dason niya, diha na usab moeksena ang mga batan-on sa ilang drama nga rambol.
Gibutyag ni Parilla nga dunay mga tanod nga gipabantay ang Kasambagan uban ang mobile patrol sa Mabolo Police Station apan sila ra usab ang bantayan sa mga batan-on.
Bisan pa niini, pahugtan pa nila ang ilang pagbantay sa mga imnanan dili lang sa Panagdait lakip na sa downtown area tungod sa pagsiaw sa tulis nga hinimoan usab sa mga batan-on.
Dako unya og matabang ang sugyot nga sayuhon ang curfew, inay alas 10:00 sa gabii, magsugod na kini sa alas 9 aron mahipos og sayo ang mga menor.