Si Justice Secretary Jesus Crispin Remulla sa Lunes, Abril 3, 2023, direktang nagngalan kang suspended Congressman Arnolfo Teves Jr. isip utok ug nigasto sa pagpatay kang Negros Oriental Governor Roel Degamo.
“Kung sa sine natin titignan ito, analogy to a movie, si Marvin (Halaman Miranda) was the director, producer of the props and casting director, siya nag-recruit ng tao, si Congressman Teves was the producer, or executive producer of the whole production, ang problema lang hindi sine, totoo ang nangyari, pinatay nila si Governor Degamo,” matod niya sa usa ka press conference sa Camp Crame.
Gibutyag kini ni Remulla nunot usab sa pagsikop sa Special Task Force (STF) Degamo kang Miranda sa Biyernes, Marso 31, sa Barangay Mayabay, Barbaza, Antique.
Si Interior Secretary Benhur Abalos niingon nga si Miranda mao ang “missing vital link” ug “usa sa mga nag-unang kakunsabo” luyo sa pagpatay kang Degamo base sa mga testimoniya sa ubang mga suspek sa pagpatay nga gidakop o ni-surrender.
Matod ni Abalos nga si Miranda dugay nang bodyguard ni Teves nga iyang gitawag nga “boss idol,” “big boss” ug “kalbo.”
Siya niingon nga si Miranda, sa instruksyon ni Teves, ni-recruit ug nihatag og materyal nga suporta alang sa pagpatay kang Degamo.
Kaniadtong 2020, gibutyag ni Degamo ang laraw sa pagpatay kaniya ug sa iyang asawa nga napakyas human madakpi ang tulo ka mga suspek sa Malay, Aklan, usa kanila, sumala sa mga taho sa kapulisan, mao si Miranda.
Si Miranda niangkon nga sad-an sa kasong illegal possession of firearms ug gisentensiyahan og usa ngadto sa duha ka tuig nga pagkabilanggo ug gipamulta sab og P10,000.
Niadtong Marso 26, gironda sa Special Investigation Task Group sa Police Regional Office-Central Visayas ang balay ni Miranda sa Bayawan City, Negros Oriental diin nakuhaan sila og mga ilegal nga armas ug mga bala, granada, ug mga litrato ni Degamo, iyang pamilya, ingon man ilang pinuy-anan.
Wala si Miranda atol sa raid.
Si National Bureau of Investigation Director Medardo de Lemos niingon nga si Miranda nadakpan sa usa ka mountain resort sa lungsod sa Barbaza diin siya giingong nagtago-tago sukad niadtong Marso 23. (TPM sa SunStar Philippines)