Gitugyan ni Cebu City Mayor Michael Rama ngadto sa 28 ka department heads sa City Hall ang pag-renew sa mga contractual employee gikan sa Enero hangtod sa Hunyo 30, 2022.
Ang pamahayag giluwatan sa mayor human aduna nay giingong contractual employees nga wala na gipa-report sa ilang mga opisina sugod kagahapon, Enero 3.
Ang mayor wala pa usab mopahibawo kon pila ka mga kawani nga na-hire sa administrasyon ni anhing Mayor Edgardo Labella ang dili ma-renew sanglit wala pay kumpleto nga lista ang Human Resource Development Office (HRDO.)
Ang Cebu City Hall adunay 10,000 ka mga empleyado, diin kapin o kulang 3,000 kanila casual ug dul-an sa 2,000 kanila mga nagkupot og regular positions samtang ang sobra mga job order.
Si Acting City Administrator Suzzane Ardosa nagkanayon nga subay sa kamanduan sa mayor, anaa na sa mga kamot sa department heads ang desisyon sa pag-renew sa kontrata sa casual employees o dili sanglit sila maoy nahibawo sa performance.
Sa pagsuwat niining balita, ang City Administrator nisuway og kontak ngadto kang Remie Vestil-Mondigo, pangulo sa HRDO, apan wala pa niya makontak aron unta pakisayran kon pila ka mga kawani ang giisyohan og notice of non-renewal.