Richard, Locsin gipangproklamar na

ORMOC City, Leyte - Giproklamar na sa City Board of Canvassers isip mayor ug bise mayor sa Ormoc City si Richard Gomez ug Toto Locsin Jr., alas 3 sa hapon, Miyerkules, Mayo 15, 2019.

Nidaog usab ang 10 ka mga kagawad ubos sa Ormoc Development Team ni Gomez.

Sa final and official results nga gipagawas sa Commission on Elections (Comelec), si Richard dunay botos nga 77,977 samtang iyang kaatbang nga si Eric Codilla dunay 29,981.

Duna kini deperensya nga 47,996 nga botos.

Samtang sa pagka bise mayor, dako usab nga botos ang nakuha sa running mate ni Gomez nga si incumbent Vice Mayor Toto Locsin Jr. nga dunay 79,674 samtang ang kaatbang niini nga asawa ni Eric nga si Jingjing dunay 24,746 botos. Dunay diperensya nga 54,928 ka botos.

Samtang sa mga konsehal, nag una si Bennet Pongos nga dunay 62,236; Roiland Villasencio - 62,149; Tommy Serafica - 59,312; Nolitz Quilang - 59,271; Gerry Penserga - 58,800; Jasper Lucero - 58,017; Perok Rodriguez - 57,415; Vince Rama - 57,327; Goito Yrastorza - 55,492 ug Lalaine Marcos - 46, 857.

Sa Ormoc City mismo, dako usab nga botos ang nakuha sa kapikas ni Richard nga si Cong. Lucy Torres - Gomez nga dunay 81,281 samtang si Winnie Codilla dunay 25,150 botos.

Nalangay ang pagproklamar sa mga nakadaog gumikan kay gipaubos sa reconfiguration ang SD card sa presinto sa Barangay Guintiguian.

Sa pakighinabi sa Superbalita Cebu, dako ang pasalamat ni Gomez sa ilang dakong kadaugan.

“It is a testament that people are really asking for change. Siguro nakita nila ang gitrabaho nato sa first term. That’s why they want to continue this development,” matod sa mayor.

Top priority sa mayor ug kaubanan ang pag improve sa water system sa Ormoc nga mamahimong barato ug maka-supply sa tanan nga kabalayan.

“Rest assured that the Ormoc Development Team headed by Lucy ug ako, will work harder para mas ma improve ang kinabuhi sa mga tawo sa Ormoc,” dugang sa mayor.

Sa iyang bahin, nagpasalamat usab si Vice Mayor Locsin sa suporta sa katawhan nga gihatag kanila.

Matod ni Locsin nga ilang suklian og maayo ug dekalidad nga serbisyo ang botos sa katawhan ug buhaton nila ang tanan nga di kini mapakyas.