Ricky Ballesteros mitaliwan na

Hulagway gikan sa Ricky Ballesteros' Facebook page
Hulagway gikan sa Ricky Ballesteros' Facebook page

Kampeyon sa Cebuano arts and culture, usa sa mga haligi sa Sinulog Festival, ug maayong higala.

Mao kini paghulagway sa pipila ka mga opisyal sa dakbayan sa Sugbo kang Ricky Ballesteros, kanhi executive director sa Sinulog Foundation Inc.(SFI), kanhi manager sa Cebu City Sports Center (CCSC) ug inilang Cebuano sports organizer.

Si Ballesteros namatay sa Sabado, Hulyo 8, 2023, sa edad nga 57.

Sumala sa mga taho, cardiac arrest ang namatyan ni Ballesteros samtang didto sa usa ka mall sa Barangay Apas, dakbayan sa Sugbo.

Si Cebu City Councilor Joel Garganera, sa usa ka pamahayag niadtong Dominggo, Hulyo 9, 2023, niingon nga ang kontribusyon ni Ballesteros sa kultura, arts, ug sports sa Sugbo naila sa kadaghanan.

“Mao ba siya sa katungdanan o dili, ang iyang kasingkasing naa didto,” matod ni Garganera.

Gawas sa pagtinabangay sa pipila ka mga proyekto, si Garganera niingon nga higala usab niya si Ballesteros.

Iyang nahinumdoman nga sa miaging tulo ka dekada, kanunay “light and fun” ang pakig-estorya o pagpakigkita kang Ballesteros.

Si Konsehal Jocelyn Pesquera, kinsa nangulo usab sa Cebu City Tourism Commission, niingon nga mapasalamaton siya sa tanang paningkamot ni Ballesteros sa pagpasiugda sa kultura sa Sugbo ngadto sa langyaw nga mga nasod, ilabi na sa South Koreans.

Si SFI executive director Elmer “Jojo” Labella, sa text message sa SunStar Cebu niadtong Dominggo, niingon nga gihangad niya si Ballesteros nga iyang gihulagway nga usa ka tawo nga dunay versatility.

Si Labella niingon nga si Ballesteros nahimong instrumento sa mga kalampusan sa kasaulogan sa Sinulog, lakip na sa workshops ug seminars. / JJL

“Suod kaayo siya nga higala, mao nga nagsuporta kanako sa dihang ako gitudlo isip bag-ong SFI ED,” matod ni Labella.

Si Ballesteros maoy manager sa CCSC niadtong 2001 hangtod 2019. Siya usab ang executive director sa SFI atol sa maong panahon.

Ang iyang 18 ka tuig nga pagdumala isip CCSC manager nabulit sa pagkawat sa P1.7 milyones nga pundo sa SFI ug CCSC gikan sa vault sa buhatan sa sports center niadtong Enero 16, 2012, usa ka adlaw human sa Sinulog Grand Parade.

Ni-resign siya niadtong 2018 nunot sa mga alegasyon ni kanhi Cebu City mayor Tomas Osmeña sa mishandling sa SFI funds, nga gihimakak ni Ballesteros.

Human sa iyang pagluwat, si Ballesteros nagsilbi isip presidente sa Korea Philippines Festival Cultural Exchange Association.

Iyang gidala ang Sinulog sa ubang kanasuran, apil na ang South Korea, diin makadaghang higayon nga midaog ang Sinulog, labi na sa Daegu Powerful Festival.

Nailhan usab si Ballesteros isip organisador sa lumba. (JJL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph