Ang runway sa Bantayan Airport lugwayan aron makatugpa ang mas dagkong commercial planes, usa ka opisyal sa airport niingon niadtong Miyerkules, Hulyo 12, 2023.
Gikompirmar ni Mactan-Cebu International Airport Authority (MCIAA) General Manager Julius Neri sa SunStar Cebu nga suportado sa Kagamhanan sa Probinsiya sa Sugbo ang extension sa kasamtangang gitas-on sa runway sa Bantayan airport gikan sa 1.2 kilometros ngadto sa 1.5 kilometros.
Ang pagtrabaho sa paglugway sa runway gibanabana nga dili moubos sa usa ka tuig, matod ni Neri.
"We are going to work on it as fast as possible. Our engineering group will have to study the specifics for the extension, they'll have to measure, fill, everything that needs to be done to make sure that it is compliant with the standard," matod niya.
Ang runway extension anaa pa sa yugto sa pagplano ug usa ka tripartite agreement ang pirmahan sunod buwan tali sa Kagamhanan sa Malawigan sa Sugbo, MCIAA ug sa GMR-Megawide Cebu Airport Corporation, taho sa Sugbo News, Cebu Capitol media arm, niadtong Martes, Hulyo 11, 2023.
Wala pa matino ni Neri kon kanus-a magsugod ang mga construction work.
Sa pakigtagbo ni Cebu Governor Gwendolyn Garcia niadtong Hulyo 11, si Neri niingon nga ang kasamtangang runway maka-accommodate lang sa gagmay nga mga eroplano ug gikinahanglan ang extension alang sa mas dagkong mga eroplano gikan sa commercial airlines nga makatugpa sa maong airport.
Si Garcia misaad nga makakuha og dugang mga propyedad sa palibot sa tugpahanan alang sa giplano nga extension.
Kon mahuman na ang runway ug ma-clear na isip operational, maka-operate na ang mga dagkong airlines lakip na ang Cebu Pacific ug Philippine Airlines sa airport. (Miguel Angelu Lumen, CNU Intern)