Kasagaran sa mga ninggraduwar sa abogasiya mag-review sa mga sentro agi og pangandam sa pagkuha sa Bar exams.
Apan dunay pipila nga nagsalig sa kinaugalingon nga pagtuon ug gitugyan ngadto sa Diyos ang tanan.
Mao kini ang gibuhat ni Buen Pogtes Algono, 49, anchorman sa sibyaanang dyHP, sa iyang pagkuha sa Bar exams sa miaging tuig, diin usa siya sa 3,992 nga nakapasar.
Way kabutangan sa kalipay ni Algono human siya pahibaw-a nga usa siya sa 3,992 nga nakapasar sa Bar Examination 2022 dihang siya gitawgan pinaagi sa cellular phone ni news director Aida dela Cruz.
Didto si Algono sa Chapel of Holy Relics sa Tabor Hills sa Barangay San Jose, dakbayan sa Sugbo aron modagkot og kandila samtang ang kadaghanan nagpaabot nga mogawas na ang resulta sa Bar Exams.
“Wala pa gani nako maugbok akong kandila, daghan na kaayo ang nanawag nako. Wala kaayo ko motuo sa unang tawag pero sa dihang nitawag na si Aida, diha na ko nakaingon nga nipasar gyud diay ko,” asoy ni Algono.
KALISDANAN
Dili sayon alang kang Algono ang pagtungha sa law school sa University of the Visayas (UV) tungod kay nagtrabaho man usab siya isip magsisibya sa dyHP ug nagsuwat usab kanhi sa mantalaang Cebu Daily News niadtong sayo sa 2000.
Human siya nakagradwar sa Law niadtong 2007, wala una nikuha sa Bar exams si Algono tungod sa kakuwang sa pinansyal ilabi na nga mogasto og dako tungod kay didto man sa kaulohan ang eksaminasyon.
Sa unang kuha niya sa Bar exams sa kaulohan, wala siya nilampos tungod sa daghang mga rason ug kakulian.
Niadtong labing una nga gihimo ang regionalized nga Bar exams sa Pebrero 2022, siya ni apply sa maong pasulit, apan usa ka adlaw sa di pa ang exams, siya nagpositibo sa coronavirus disease (Covid-19) bisan sa iyang pag amping.
Siya nahugno tungod kay gipangandaman niya kini pag-ayo pinaagi sa subsub nga pagtuon sa mga subject sa abogasiya.
Alang niya, dunay plano ang Labaw nga Makagagahom kon nganong wala mahinayon ang iyang pag take sa exams.
Saksi ang usa ka punoan sa lumboy sa luyo sa sibyaanan sa dyHP nga gihimo niya nga “review center” sa iyang pagpaningkamot nga matun-an ang mga libro nga maoy posibling kuhaan sa mga pangutana sa eksaminasyon.
Gitugtan siya sa management sa building nga mag-atop-atop lang sa punoan sa lumboy diin didto na gani siya maabtan og buntag.
Wala niya baliha ang daghang mga lamok ug ang kahasol nga mabasa kon mobunok ang kusog nga ulan.
Apan kining tanan nga sakripisyo nga iyang gihimo nagbunga tungod kay siya nahimong abogado.
Dako matod pa og natabang ang suporta sa mga kauban sa trabaho ug ang iyang pag ampo sa Ginoo nga iyang gihulagway nga usa sa labing mahinungdanon.