ORMOC CITY - Pormal nang gibuksan sa SM Prime Holdings ang usa sa ilang mga mall sa nasud sa niadtong Biyernes, Nobiyembre 16.
Ang SM Center Ormoc nga nahimutang sa dalan Real, Dakbayan sa Ormoc ang ika 72 nila nga mall nga gibuksan.
Ang pagbukas gisugdan sa santos nga misa ug dayon ang ribbon cutting sa Hypermaket.
Nitambong mao sila si Hans Sy, chairman sa executive committee sa SM Prime Holdings; Herbert Sy, vice chair, SM Markets Inc.; Jeffrey Lim, SM Prime president; ug Steven Tan, chief operations officer sa SM Supermalls.
Gidapit usab sila si Ormoc City Mayor Richard Gomez, Vice Mayor Toto Locsin Jr, mga konsehal ug Kongresista Lucy Torres - Gomez.
Gibuksan sa publiko ang mall alas 3 sa hapon diin liboan ang nidagsa nga gikan pa ang uban sa laing lungsod.
Tulo ka andana ang maong mall diin sa groundfloor nahimutang ang hypermarket ug mga inilang fastfood ug brand sa sinina.
Sa ikaduhang andana ang ika 64 nga state-of-the-art nga SM Cinema. Duna kini 3 ka digital cinemas ug 1 ka director’s club.
Ang maong mall adunay gidak-on nga 15,782 square meter diin likod niini ang historical nga Anilao River.
Matag andana, adunay igo nga parking space sa 426 ka sakyanan, dunay 8 ka person-with-disability slots ug 133 ka motorcycle slots.
Duna usay 12 ka terminal slots sa ground floor.
Matod ni Tan nga plano nila palapdan pa ang maong mall kon dunay igong yuta.
Nakita sa SM Prime Holdings ang potensyal sa Ormoc gumikan kay daghang tawo ang modagsa gikan sa laing lugar kay usa kini ka port city.
Kasagaran sa mga nakatrabaho sa mall pulos taga Ormoc diin nagpasalamat ang lokal nga kagamhanan sa maong oportunidad.