Sakop sa Badac sa Suba ‘pusher’

SAKOP sa Barangay Anti Drug Abuse Council (Badac) sa Barangay Suba, siyudad sa Sugbo, nadakpan sa gilusad nga buy bust operation sa Pardo police station.

Nakuhaan kinig kapin sa P2 million nga balor sa illegal nga drugas. Nakurat ang hepe sa kapulisan sa syudad sa Sugbo nga ang usa sa mga nadakpan sa synchronized enhanced management police operation (Sempo) sa Cebu City Police Office sud sa 48 oras sakop Badac.

Ang nadakpan giila nga si Lourdes Abella, 43, taga Belgium st., Barangay Suba, sa syudad sa Sugbo. Gisikop siya pinaagi sa buy bust operation sa mga sakop sa Pardo police station sa Barangay Bulacao.

Si Abella nakuhaan og 310 gramos sa gituohang shabu nga adunay Dangerous Drugs Board (DDB) value nga moabot og P2,108,000.

Gipanid-an sa Pardo police si Abella human nigawas ang iyang ngalan sa ilang mga madakpan nga namaligya og shabu.

Sa pagpangulo sa ilang hepe nga si Chief Insp. Regino Maramag, ilang napusasan si Abella human nitunol sa usa ka putos nga gituohang shabu.

Matod ni ni Cebu City Police Director Sr. Supt. Royina Garma nga ang pagkasikop sa usa ka sakop sa Badac makapaalarma na tungod kay ang trabaho sa usa ka miyembro sa Badac mao ang pag-monitor sa problema sa illegal nga drugas sa ilang lugar. (AYB & Angelo H. Seismundo, USJ-R Intern)