Sakop sa Cafgu 'nanio’g' armas
Usa ka sakop sa Cafgu Active Auxiliary (CAA) giingong nanion og armas kay nasuko human nasayod sa giingong pag-harass sa usa ka lalaki sa iyang ig-agaw nga babaye atol sa disco sa Purok Banker, Brgy. Lutac, City of Naga, alas 12:30 sa kaadlawon sa Huwebes, Agusto 24, 2023.
Si Daryl Ababa, 19, dunay kapuyo, nagpuyo sa nahisgutang lugar, nangayo og tabang sa kapulisan nianang alas 3:00 sa kaadlawon sa samang adlaw.
Uban ni Ababa ang iyang pamilya sa pag-adto sa buhatan sa kapulisan, gi-turnover ang usa ka .38 kalibreng revolver.
Samtang, napusasan si Han Lheiy Canonigo Duran, 20, alyas Tawtaw, nagpuyo sa dapit.
Si Ababa nibutyag sa kapulisan nga hubog si Duran nga niabot ug gitiunan siya og pusil samtang nagtalikod.
Apan nabantayan sa iyang mga kabanay ug ilang nadis-armahan.
Si Duran nga nahinabi sa Superbalita Cebu sa Huwebes samtang siya gipriso, nihimakak sa pasangil nga siya nanghulga ug nanion og armas.
Matod niya nga nakainom siya samtang nag-disco apan kalit nga nangayo og tabang kaniya ang iyang ig-agaw nga babaye nga naghilak nga nisugilon nga gi-harass siya sa usa ka Daryl.
Tungod sa iyang kalagot, gipangita niya si Daryl.
“Nagsayaw siya unya dim man suga sa disco. Giana-ana daw. Kanang gihikaphikap...nasinta ko,” dugang ni Duran.
Nakit-an niya si Daryl ug gikomprontase apan sila nagkauli ra human nagpinasayloay.
Siya nipasangil nga dihang siya nitalikod, dunay mihagtok sa likod sa iyang ulo.
Gipadayag niini nga gibunalan ang iyang ulo og botelya hinungdan nga nakuyapan siya.
“Wala na ko masayod unsay nahitabo. Pagmata nako police station na,” dugang ni Duran. / GPL