Gihimakak sa usa ka alyas ‘Kano’ nga iya ang 1.115 kilograms nga shabu nga nagkantidad og P7.5 milyunes nga nasakmit atol sa buy-bust sa Drug Enforcement Unit sa Sawang Calero Police Station sa Cebu City Police Office (CCPO), alas 10:50 sa gabii sa Miyerkules, Hulyo 19, sa Block 7, Barangay Sawang Calero, dakbayan sa Sugbo.
Si Jake Merson Rafols Mercado, alyas “Kano”, 33, dunay kapuyo, residente sa nahisgutang dapit, gikonsiderar sa kapulisan nga high value individual (HVI) tungod sa gidaghanon sa illegal drugs nga nasakmit gikan kaniya.
Ang mga sakop sa Sawang Calero Police Station nipalit og shabu nga mobalor og P15,000 gamit ang boodle money.
Dihang napusasan, nakuha sa posisyon ni Mercado ang tulo ka gagmay nga mga putos ug 11 ka medium nga bulto sa drugas.
Si Police Col. Ireneo Dalogdog, director sa CCPO, nagkanayon nga si Mercado, gawas nga bigtime pusher, usa usab ka sakop sa gun-for-hire.
Apan si Mercado nga nahinabi sa Superbalita Cebu nihimakak nga iya ang daghang shabu.
Sumala niya nga nagkaon siya sa usa ka tindahan ug kalit nga dunay niabot nga tawo ug gipusasan siya ug dayon dunay shabu nga giingong nakuha gikan niya.
Giklaro niya nga nabilanggo na siya City Jail niadtong 2020 gumikan sa paggamit sa drugas.
Nakagawas siya sa City Jail niadtong 2021, sukad niadto nangarga na lang siya og isda sa Pasil Fish port.
Giklaro sab niya nga wala siyay grupo, wala siya nasayod sa mga pasangil.
Ang suspek pasakaan og kaso sa kapulisan sa paglapas sa Republic Act 9165 kun Comprehensive Dangerous Drugs Act of 2002. (GPL)