SAKOP sa Ozamis drug group ug anaa sa top 2 nga drug personality sa dakbayan sa Talisay nasikop sa kapulisan sa ilang anti-drug operation sa Barangay Tanke, kagahapon sa buntag.
Mokabat sa P500,000 ang kantidad sa shabu nga nakuha gikan sa dinakpan.
Ang kapulisan sa Talisay niila sa nasikop nga si Wilmer Macarambon, alyas Wilmer Oca, 39, taga didto ra usab sa lugar.
Si Supt. Marlu Conag, hepe sa Talisay City Police Station, niingon nga dugay na nilang gipangita si Macarambon.
Hangtod nga nakadawat silag report labot sa presensya niini sa lugar hinungdan nga dali silang nilusad og buy bust operation.
Nakuha gikan kang Macarambon ang shabu nga motimbang og 84.1 gramos nga mokabat sa P500,000 ang balor.
Sa dihang nasikop si Macarambon, nitudlo kini sa usa ka Baby Cherryl Obseqias, minyo, 35, nga giingong tigpayuhot og ilegal nga drugas sa lugar.
Gibutyag ni Conag nga si Macarambon adunay kasong ilegal nga drugas ug paghupot og granada, apan nabasura sa korte.
Ila pa usab nga gisubay ang report nga si Macarambon suspek usab sa pagpamusil.
Dugang nasayran sa kapulisan nga ang supply nga shabu ni Macarambon gikan sa Ozamis hinungdan nga ila kining gihulagway nga bigtime.
Apan ang mga suspek pulos nanghimakak sa pasangil batok kanila.