Giawhag ni Talisay City Mayor Gerald Anthony ‘Samsam’ Gullas ang iyang kaatbang nga si City Vice Mayor Alan Bucao nga moduso og protesta alang sa pagpa-recount sa botos nga nakuha inay mopetisyon sa pagdeklarar og failure of election sa dakbayan niadtong Mayo 9, 2022.
Atol sa pakighinabi sa mga tigbalita, gihulagway ni Gullas nga ‘fake protest‘ ang giduso sa kampo ni Bucao aron magpadayon ang suporta sa ilang mga dumadapig.
“For me that is a fake protest. It is done to satisfy their feelings and their supporters ang ilang gipangayo recount man gyud,”matod ni Gullas sa Hunyo 20, 2022.
Gikuwestyon ni Gullas ang katuyoan sa protesta niini pagpadeklarar og failure of election sa siyudad nga nakaproklamar na og mananaog ang Commission on Elections (Comelec).
“Ang ilang protesta di man gani recount ang ilahang protesta to declare failure of election. How can you declare failure of election when an election took place and the Comelec had proclaimed someone as the winner so it is a fake protest done to satisfy their feelings and to hold on to their supporters,” matod ni Gullas.
“Ang ako ra gyud is if you really felt you won last elections, mohangyo ko sa akong kaatbang mohangyo ko ni Vice Mayor Alan, kon moprotesta gyud ka, file a protest for recount coz you are filing a fake protest,” dugang niya.
Kahinumdoman nga giingong niduso og petisyon si Bucao sa buhatan sa Comelec, Manila sa Mayo 20, tungod kay nagtuo siya nga lapad ang nahitabong tikas atol sa adlaw sa piniliay sa Mayo 9, 2022.
Giingong may 27 na usab ka mga witness nga makasaysay sa alegasiyon niini.
Subay niini, masaligon si Gullas nga dili kini makaapektar sa mga serbisyo ug trabaho sa kagamhanan sa siyudad ilabi na ngadto sa mga konstituwente niini.
Si Gullas midaog og 93, 701 votes batok ni Bucao nga nakakuha og 31, 277 votes.
Gideklarar nga mananaog si Gullas isip reelected mayor ug samtang nidaog usab ang iyang bise mayor nga si Richard Francis “Choy” Aznar nga pormal nang molingkod sa pwesto sa Hunyo 30 sa udto.