Gipahibalo sa Sandiganbayan ang desisyon sa anti-graft court nga nibalibad sa hangyo ni kanhi first lady Imelda Marcos ug sa iyang anak nga si Irene Araneta Marcos alang sa pagpagawas sa pipila sa ilang kabtangan nga dugay nang giangkon nga ill-gotten wealth.
Sa usa ka resolusyon nga giproklamar niadtong Mayo 4, 2023, gibalibaran sa Sandiganbayan ang motion for reconsideration nga gisang-at sa mga Marcos niadtong Pebrero 17, 2023, nga nagtinguha nga balihon ang desisyon sa ikaupat nga dibisyon niini nga gipagawas niadtong Enero 25.
“A Motion for Reconsideration should be denied when the same only constitutes a rehash of issues previously put forward. A careful reading of the defendants’ motion shows that they did not present any new arguments which would warrant a reconsideration of the Court’s Resolution dated 25 January 2023,” tipik sa resolusyon.
Ang anti-graft court, sa ilang desisyon niadtong Enero 25, mihimakak sa mosyon nga gisang-at sa mga Marcos alang sa maong katuyoan niadtong Agusto 2022 tungod sa kakuwang sa merito.
Naglambigit kini sa 22 ka propiyedad nga denominado isip frozen accounts, gi-surrender tungod sa compromise agreements, gi-sequester (apan) wala sa kustodiya sa Presidential Commission on Good Government (PCGG) ug gi-sequester ubos sa kontrol ug superbisyon sa PCGG.
Ang nasangpit nga mga kabtangan giingong illegal nga nakuha sa pamilya atol sa administrasyon sa patriarch niini nga si kanhi Presidente Ferdinand Marcos Sr.
Ang mga Marcos niingon sa ilang apela nga ang mga propiyedad nga gibalhin ngadto sa gobiyerno o ikatulo nga partido dili pa moot ug academic, kay kini angay nga isipon nga null ug void.
Dugang pa nila, ang PCGG naglihok lamang isip conservator sa nahisgutang kabtangan, nga gikonsiderar nga ill-gotten wealth. (SunStar Philippines)