MAGPADAYON sa pagpangolekta og samples alang sa bio-surveillance ang Department of Health (DOH) 7 aron makita ang kinatibuk-an nga aboton sa presensya sa Sars-CoV-2 mutations kon “mutations of concern” (MOC) dinhi sa Central Visayas.
Kini, human gitaho sa DOH central office, sa University of the Philippines (UP) - Philippine Genome Center (PGC) ug sa UP-National Institutes of Health, kagahapon, Pebrero 21, 2021, nga adunay tulo ka dugang samples gikan sa rehiyon nga nakitaan og N501Y ug E484K mutations (MOC) human sa gihimo nga enhanced genomic bio-surveillance.
Gibalik hinuon pagpahimangno sa DOH 7 nga natural ra alang sa mga virus ang moagi og mutations kay parte kini sa iyang survival sa harsh environment kon sulod sa lawas sa iyang host.
Kini nga mutations mahitabo samtang nag-reproduce kini sulod sa lawas sa tawo ug panahon sa transmission gikan sa usa ka host ngadto sa lain.
Sa Pebrero 18 nga pahayag sa DOH, niingon kini nga ang mutations mo-accumulate kon magdap-og over time ug adunay mga nagkalainlaing epekto, apan dili tanang mutations ug variants adunay negatibo nga epekto.
“Variants, on the other hand, refers to a group of viruses that have similar set of mutations,” matod sa DOH.
Sigon ni Dr. Mary Jean Loreche, tigpamaba sa DOH 7, nga nagtigom ang health authorities sa rehiyon niadtong Sabado sa gabii aron matuki kining bag-o nga kalambuan mahitungod sa MOC sa rehiyon.
Dugang sa pagkolekta og samples, matod niya, makig-partner usab sila sa private hospitals alang sa pag-transfer sa asymptomatic patients kon mildly symptomatic ngadto sa temporary treatment and monitoring facilities (TTMFs) aron mareserba ang Covid beds alang sa mga moderate, severe, ug critically ill nga mga pasyente.
Dugang niya makig-alayon usab sila sa ilang partner agencies sama sa Department of Tourism (DOT), Hotel, Resort and Restaurant Association of Cebu (HRRAC), ug Bureau of Quarantine alang sa pag-accredit ug pagtino og hotels nga mamahimong step down facilities alang niini nga gi-admit nga mga pasyente aron usab sa paglig-on sa isolation facilities alang sa mga asymptomatic.
“In doing this, we continue to have our CCUR (critical care utilization rate) in the safe zone,” matod niya.
Gipahibalo sa DOH central office nga usa ka sample nga gikan sa last genome sequencing batch sa Central Visayas ang nakitaan og duha ka mutations samtang duha ka lain pa gikan sa 80 ka samples nga gipadala sa DOH 7 gikan sa ikapito nga batch nga gi-sequence, nakitaan sad sa mao nga mutations.
Matod sa DOH, kini mao ang ika-34 nga samples nga nakitaan og co-occurence sa duha ka mutations. (WBS)