Nagduda na karon ang kapulisan sa dakbayan sa Sugbo sa pangangkon sa usa ka Chinese national nga si Jason Montero Co nga 'gidagit' uban sa iyang duha ka mga trabahante samtang nagkarga sa ilang kinompra sa Carbon Public Market sa alas 9:20 sa Lunes sa buntag, Hulyo 10, 2023.
Si Co nagkanayon nga upat ka mga lalaki nga dagkuon og lawas mao ang ningdala ug gibiyaan sila sulod sa sakyanan sa Brgy. Campo 4, dakbayan sa Talisay nga ginapos ang ilang mga kamot ug tiil dayon gikuha ang iyang cash nga P100,000 ug ATM card.
Tungod niini, nihimo dayon og imbestigasyon ang Carbon Police Station inabagan sa Talisay City Police Station labot sa pangangkon sa langyaw nga negusyante apan nasuta nga walay kagubot sa lugar nga unang gibutyag sa biktima.
Matod ni Police Major Miles Damoslog, hepe sa Carbon Police Station, nga wala nakabantay ang mga tawo sa dapit nga dunay kagubot bisan nianang mga orasa daghan na kaayo ang mga tawo.
Sa dihang gipatawag si Co, nibutyag na usab kini nga dili sa Carbon sila gidagit, sa Compania Maritima diay nga sakop sa Waterfront Police Station ug nidason nga alas 7:00 sa buntag ug dili na alas 9:00 subay sa unang taho.
Dali nga nisubay ang mga imbestigador sa Waterfront Police sa Compania Maritima apan wala usay nakakita og puti nga van nga gi-parking ug gipangtan-aw ang mga kuha sa CCTV camera, apan wala gihapoy nakita.
Gipatawag pagbalik si Co, matod ni Police Major Efren Diaz, hepe sa Waterfront Police Station, apan dihang gisubayan sa resulta sa imbestigasyon, lahi na usab ang iyang pamahayag tungod kay didto na usab sila gidagit dapit sa APM Mall.
"Wala mi nakuha nga footage sa van niya," matod ni Diaz.
Dinhi na nagduda ang kapulisan nga way kamatuoran ang pasangil ni Co gumikan kay wala na siya makasiguro kon asa gyud nahitabo ang krimen.
Bisan pa niini, gimandoan sa direktor sa Cebu City Police Office (CCPO), Police Colonel Ireneo Dalogdog, ang hepe sa Mabolo Police Station nga si Police Major Eranio Regidor, nga mohimo og imbestigasyon ug subayon ang mga kuha sa CCTV camera sa dapit diin gitudlo ni Co kon asa sila gidagit.
Matod ni Regidor nga base sa inisyal nga imbestigasyon pinaagi sa mga pamahayag sa mga drayber sa habalhabal, way komosyon sa maong dapit gikan sa buntag hangtod na sa gabii ug dali ra usab mabantayan tungod kay duol ra kaayo ang police station.
"Gabii immediately nag conduct tag ocular inspection base pud sa interview sa mga habal-habal driver ug security guards nga naa sa area apil ang ambulant vendors. Negative gyud nang panahona nga naay commotion kay kon naa pa, duol kaayo ang police station, walking distance ra gyud," matod ni Regidor.
Kon masuta sa imbestigasyon, matod ni Dalogdog, nga namakak o naghimo-himo lang og estorya ang langyaw, ila kining pasakaan og kasong perjury sanglit naghatag lang kini og dili maayong imahen sa seguridad sa dakbayan.
Pasabot ni Dalogdog nga base sa statistics sa CCPO, nagkaubos ang crime volume itandi sa nanglabay nga mga buwan tungod sa presensya sa kapulisan sa kadalanan.
"We will assure the public nga kining ingun ani nga klase nga tao ato gyud ni pasakaan og sumbong," matod ni Dalogdog.
Dunay gihatag nga ngalan si Co kon kinsa ang nitulis ug nidagit kanila nga ginganlan lang og "Mark" nga wala niya mailhi kon unsay apelyido ug taga diin.
Mohimo usab sila og background investigation kang Co kon wala ba kini malambigit sa ilegal nga kalihukan sa iyang negosyo sanglit daghan ang nadawat nga impormasyon si Dalogdog labot sa maong langyaw.
Usa sa kasaligang tinubdan nga imbestigador sa kapulisan nibutyag nga ang duha ka mga trabahante sa langyaw ningluwat na og pinanumpaang pamahayag nga way nahitabong pagpanagit.
