Ang Seabus sa Topline mohimo sa ilang unang paglawig karong Martes, Agusto 15, 2023, gikan sa Pier 88 sa lungsod sa Liloan paingon sa Mactan Wharf sa dakbayan ug pabalik.
Kini ang gipahibalo ni Lapu-Lapu City Mayor Junard “Ahong” Chan sa iyang official social media page sa Miyerkules, Agusto 9, 2023.
“Dali ug paspas na lang ang inyong pag biyahe paingon sa Liloan ug maka-save pa gyud mo,” dugang ni Chan. “O, sa ubang destinasyon sa Cebu North.”
Sa soft launching niini, si Chan niingon nga ang mga pasahero makatagamtam sa promo fare nga P35 gikan sa regular nga pletihan nga P50.
Ang Seabus molawig gikan sa Lunes hangtod sa Sabado sugod sa alas 5 sa buntag ug ang katapusang biyahe sa alas 7 sa gabii.
Kini barkong pasaheroan nga dunay 150 ka mga lingkuranan nga gipanag-iya ug gipadagan sa Topline Group of Companies.
Kini nagdunggo sa Pier 88, ang bag-o, modernong pantalan sa Liloan nga gitukod ug gidumala sa Topline.
Ang rota sa dagat gipaabot nga mopakunhod sa oras sa pagbiyahe gikan sa duha ka oras sa sakyanan sa yuta ngadto sa 45 minutos sakay sa Seabus.
Ang maong bag-ong rota nga motadlas sa Mactan Channel usa ka alternatibo sa taga amihanan sa Lalawigan sa Sugbo o ang daghang trabahante sa Mactan Economic Zone (MEZ).
Usa sa nag-unang reklamo sa mga sumasakay sa dapit mao ang nagkagrabe nga trapiko sa kadalanan padulong ug balik sa Mactan labina panahon sa rush hours. / EHP