Makahuluganon ang kinaiyahan alang sa Solid Earth Development Corp. (SEDC) nga padayong mipalab-as sa panumdoman sa mga kawani ug sa primera kliyente ug sa mga tigsangkap niini aron mas mapalapdan pa ang ilang kaamgohan ug panimuot sa pag-amuma sa kalikopan.
Gipasiugda niini ang laing seminar kabahin sa Environmental Management sa admin conference room sa Taiheiyo Cement Philippines, Inc. (TCPI).
Gidapit sa SEDC ang kadagkuan sa Environment Management Bureau (EMB) sa Department of Environment and Natural Resources (DENR) sa rehiyon isip mga tinubdan sa maong seminar nga giapilan sa nga sakop sa TCPI environment and safety.
Gihangop ni Eng’r. Samuel O. Tagsip ang mga dinapit ug nanambong, lakip na sa mga kawani sa San Fernando Integrated Services & Equipment Corp., BNR Construction & Development Corp., ug Triple 8 Resources Development Corp.
Gipasabot ni Jovelino C. Abe sa EMB-7 ang pangatarungan sa seminar, samtang gikutlo sa kauban niyang information officer Mary Joy B. Molina ang Ecological Solid Waste Management Act (Republic Act 9003).
Nanawagan siya nga “Waste no Time and Go for Resource Circulation,” matod ni Mitzie Almira I. Carin, tagduma sa SEDC human resources and administration division.
Gituki ni Eng’r. Cindylyn Pepito-Ochea, hepe sa EMB-7 Environmental Education and Information Unit (EEIU), ang Air and Water Management giniyahan sa Clean Air Act (Republic Act 8749) ug Clean Water Act (RA 9275).
Gipadayag ni Ma. Fatima R. Secuya, usa sa mga batid sa EMB-7 kabahin sa kalikopan, ang “Climate Change and Plastic Pollution: Step up. Act now!” ug gihisgotan pa ang “Climate Change Act and Attaining a Plastic-Free Lifestyle.”
Samtang, gipahigayon sa SEDC ang usa ka EcoBricks Training sa ikaduhang komunidad nga gipatudluan niini, dayon nananom didto sa SEDC-EcoPilgrimage Park, ug nanglimpyo sa sapa ug kabaybayonan. (PR)