Gihingusgan karon sa Philippine National Police (PNP) ang paglimpyo o internal cleansing sa ilang hut-ong batok sa mga police personnel nga nalambigit sa ilegal nga kalihukan.
Atol sa pagbisita sa Sugbo sa ikaduha nga labing taas nga opisyal sa PNP sa nasod nga si Police Lieutenant General Rhodel Sermonia, PNP Deputy Chief for Administration, siya nipahimangno sa mga polis nga magtinarong sa ilang serbisyo.
Gitahasan sa Camp Crame ang mga chief of police nga makapatuman sa disiplina sa ilang tawo kon kini nakahimo og kalapasan.
Gibaharan usab niya ang tanang police officials gikan sa station commanders ngadto sa labing taas nga ranggo sa PNP sama sa Chief PNP nga mahimo sila nga maigo og kaso nga gitawag nila og command responsibility aron matangtang sa serbisyo.
“Winawarningan din po natin ang ating mga commanders at all levels ibig sabihin kahit Chief PNP ka, kahit director ka ng support unit, kahit regional director ka, kahit general ka na kagaya ko, provincial director, chief of police or mas mababang ranggo ng commander ay talagang ipapasatupad po natin ang tinatawag na Doctrine of Command Responsibility,” matod ni Sermonia.
Giangkon ni Sermonia nga duna pay mga polis nga mga badlungon ug angay nga pahamtangan og silot sama sa nahitabo sa Navotas ug sa pipila ka lugar sa Luzon.
Samtang andam usab nga mohatag og pasidungog ang Camp Crame niadtong angay nga pasidunggan.
Kini sama sa dali nga pagsulbad sa pagdagit sa batang babaye sa Mandaue City diin sulod lang sa tulo ka oras ilang naluwas ang biktima.
Lakip na ang dali usab nga pagsulbad sa linuog nga pagpatay sa 19 anyos nga dalaga nga si Reah Mae Tocmo niadtong Hulyo 17, 2023.