Giabisuhan ni Mayor Sun Shimura sa lungsod sa Daanbantayan, amihanang Sugbo, ang mga dive resort ug dive shops sa isla sa Malapascua, kinsa nag-empleyo og mga langyaw sa pagsunod sa balaod sa pamuo sa nasod.
Si Shimura niisyu og memorandum ngadto sa dul-an 50 ka business establishments sa maong isla gumikan sa gipadangat nga reklamo sa Malapascua Business Association atol sa ilang gipahigayon nga meeting sa wala pa ang Semana Santa niadtong Abril.
Ilawom sa Department of Labor and Employment (Dole) Department Order No. 221 Series of 2021, ang mga foreign national nga magtrabaho sa Pilipinas nga walay Alien Employment Permit (AEP) ug ang kompaniya nga masakpang nag-empleyo og langyaw, makamulta og P10,000.
Gawas niini, did-an usab silang maka-file og AEP sulod sa lima ka tuig.
Gumikan niini, si Shimura nimando sa temporaryo nga pagpahunong sa pag-hire og foreigners nga magsibling dive instructors nga walay AEP gikan sa Dole.
Ang dili mosunod sa kamanduan sa mayor mag-atubang og silot nga pagkanselar sa ilang mga business permit.
“Continued conduct of the above cited prohibited acts including surreptitious defiance of this order shall be subject to the immediate revocation of your business permit,” tipik sa suwat ni Shimura.
Ang mayor nibutyag nga rason sa mga dive resort mao ang ‘language barrier’ sanglit mga European ang sagad sa mga turista nga ganahan mag-dive apan gipadayag ni Shimura nga kamao nga mag English ang taga Bantayan.
Si Shimura, kinsa usa sab ka diver, nagkanayon nga niadto pang uwahing bahin sa 1990’s nagsugod og dive ang mga sakop sa Malapascua Thresher Shark Divers (MTD) nga mga kwalipikadong dive instructors ug aduna nay mga certificate isip master divers.
Buot sa mayor nga ang taga isla o taga lungsod maoy unang makatrabaho sa mga dive resort, inay ang mga langyaw, sanglit ang abilidad sa mga foreigner kaya nga himuon sa mga lokal.
“Malapascua Thresher Shark Diver (MTD). These are all locals. We have a lot of local dive instructors, dive masters already and these people are learning English every minute of the day. Diving here in Malapascua started in 1999. Everybody was already diving,” matod sa mayor.
Si Shimura nagkanayon nga mopahigayon siya og meeting uban sa MBA, Bureau of Immigration ug Dole aron paghatag og solusyon sa maong problema sa sunod nga mga semana.