‘Shoplifter’ nga nag-Starex van nadakpan su’d sa mall sa Liloan

Ginang nga nag-shopping sa mall sa Brgy. Poblacion, lungsod sa Liloan, amihanang Sugbo alas 6:05 sa gabii sa Huwebes, Agusto 24, 2023 nasakpang wala nibayad sa iyang gikompra.

Ang suspek nga nasikop sulod sa mall giilang si Lornet Clarin Gatmaitan, 37, taga Barangay Sigue, dakbayan sa Toledo.

Wa na igkita ang iyang mga kaubang nagsakay sa usa ka Starex van nga gituohang nakasibat dayon.

Si Police Staff Sgt. Jayson Gayo sa Liloan Police Station nga nahinabi sa Superbalita Cebu sa Agusto 25, 2023 nagkanayon nga ang suspek uban sa mga kauban diha sa supermarket sa mall.

Wala kini niagi sa cashier ug nideretso sa paggawas apan nabantayan sa mga house detective hinungdan nga nadakpan.

Narekuber sa possession nini ang canned goods nga mobalor og P11,533.25.

Sumala ni Gayo nga dunay mga kauban ang suspek nga nagsakay sa Starex van base sa mga kuha sa closed circuit television (CCTV).

Base sa kuha, makatulo na nagbalikbalik ang van sa parking lot sa mall sa paghakot sa mga kinawat.

Dihang gisusi, nahanaw na ang van.

Ang suspek gitanggong na sa police station ug pasakaan og kasong pagpangawat. / GPL