Usa ka shoplifter ang nasakpan sa usa ka dakong mall sa sentro sa lungsod sa Liloan, amihanan sa Sugbo, alas 3:55 sa hapon sa Dominggo, Hunyo 18, 023.
Ang suspek nga naposasan mao si Marjorie Animas Pavon, 35, dalaga, taga Brgy. Sawang Calero, dakbayan sa Sugbo.
Nabawi gikan sa iyang posisyon ang 22 ka lata sa Spam nga mobalor og P5,746.
Si Police Senior Master Sgt. Richard Ares, imbestigador sa Liloan Police Station nga nahinabi sa Superbalita Cebu, nagkanayon nga ang suspek nakita sa closed-circuit television (CCTV) camera hinungdan nga nadakpan.
Apan, nasayran sa imbestigasyon sa kapulisan nga nakaipsot ang iyang kauban nga usa ka Arnold Legazpi, taga dakbayan sa Talisay.
Matod ni Ares, sa pag-monitor sa guwardiya sa surveillance camera, nasuta nga ang suspek nagdala og bag apan wala moagi sa kahera ug nidiretso sa main exit sa mall hinungdan nga gialerto ang guwardiya, gi-hold ang suspek ug nakuha sa posisyon niini ang mga nilata.
Sa gipahigayon nga inventory, nasuta nga missing ang 1,818 ka lata nga mobalor tanan sa P371,916.
Nasuta nga nagsige og balikbalik ang suspek sa mall.
Gisubay na sa kapulisan ang background sa suspek. (GPL)