Nagtingkagol sa bilanggoan ang 25 anyos nga lalaking taga dakbayan sa Talisay nga gisikop human makuhai og armas sa usa ka raid sa Martes sa kaadlawon, Mayo 30, 2023 sa Purok Gumamela, Brgy. Biasong sa mao nga siyudad.
Giila ang suspek nga si Christian Dagatan Sialana, bagger sa usa ka tindahan sa Barangay Basak San Nicolas, Cebu City.
Mga silingan sa suspek nangreklamo sa giingong pagsige niya og pabuto.
Ang grupo ni Police Lieutenant Colonel Randy Caballes, hepe sa Talisay City Police Station, nibutyag nga na pinasikad sa search warrant nga giluwatan ni Executive Judge Marlon Jay G. Moneva sa Regional Trial Court (RTC) Branch 74 sa Dakbayan sa Sugbo pinitsahan og Mayo 25, 2023, ilang gironda ang balay niini.
Matod ni Caballes nga si Sialana gireklamo sa iyang mga silingan nga sige pabuto og armas ug gihulagway nga badlungon.
Atol sa pagronda, ilang narekober sulod sa balay ang usa ka kalibre .45 nga pistola, magazine niini ug usa ka bala.
Lakip nga narekober ang lain pang armas nga 9mm nga armas ug dunay usa ka bala.