USA ka signature campaign ang gilusad sa pipila ka mga residente sa Barangay Sapangdaku, Dakbayan sa Sugbo isip timaan sa pagsupak sa katukoran sa Cebu City Botanical Garden Cemetery (CCBGC).
Ang grupo sa mga homeowners, labi na sa mga nagpuyo sa subdivision sa maong barangay ug uban pa, nipadangat sa ilang kabalaka sa higayon nga matukod na ang sementeryo.
Ang kalihukan gikumpirmar ni Barangay Kapitan Juvie Lagraso, kinsa niingon nga nagpatabang kaniya ang mga lumolupyo apan iyang gibalibaran sanglit nakahatag na siya og suporta sa Siyudad.
“Giingnan pa gani ko, Kap, magpapirma ta sa imong mga tawo. Akong giingnan nga dili akoy mangusog anang signature campaign. Ang ako lang kon unsay pulso sa mga tawo pananglitan, kamo na lay lihok ana kay ako basta kaayohan ug dili delikado sa mga tawo, dili gyud ko mopugong ug ang council,” padayag ni Lagraso.
Si Juan Antonio Jimenez-Martinez, lumolupyo sa Garden Grove Villa sa maong barangay, nipadala og suwat kang Mayor Edgardo Labella, Regional Director Lormeyn Claudio sa Environmental Management Bureau (EMB) 7, Regional Director Paquito Melicor, Jr. sa Department of Environment and Natural Resources (DENR 7) ug Regional Director Jaime Bernadas sa Department of Health (DOH 7) para ipaabot ang ilang kabalaka.
Sila si Martinez ug Babylyn Palban, school principal sa Sapangdaku Elementary School, nipadangat sa ilang kahingawa gumikan kay mahimong maapektohan ang ilang supply sa tubig nga gikan sa bukid.
“Nagkasinabot mi diha kay naa may mga subdivision sa Sapangdaku ug naglusad mi og signature campaign opposing the construction of the cemetey. Unang rason namo kay ang source sa tubig gikan gyud sa bukid. Ang MCWD dili gyud makaabot sa Sapangdaku. Nag-rely ra ang mga residente sa source sa tubig,” padayag ni Palban, kinsa 20 ka tuig nang nagpuyo sa lugar.
Ikaduha nilang concern mao ang kahagip-ot sa karsada paingon sa Sapangdaku diin iyang gihulagway nga maglisod og agi ang duha ka mga sakyanan nga magsugat.
Atol sa pagsuwat niining balita, wa pa masayri kon pila na kabuok ang nipirma sa petisyon sanglit gusto nila nga madungog usab ang ilang yangungo.
Sa miaging semana, ang barangay council inubanan sa DENR ug City Government nipahigayon og public hearing.
Atol sa hearing, giuyonan nila ang pagtukod sa sam-ang uban sa pagsiguro nga kini di makahatag og peligro sa mga lumolupyo. (PAC)