SECURITY guard patay human nakigpinusilay sa kapulisan sa dihang nag-wild sulod sa buhatan sa Dasia Security Agency, sa may dalan Jakosalem, Cebu City niadtong Lunes, Oktubre 11 sa 6:45 sa gabii.
Si Ernesto Benedicto Jr., 31, ulitawo, nagpuyo sa Barangay Zapatera ug lumad nga taga-Cagayan de Oro City.
Si Benedicto namatay human sa pipila ka oras kinsa dali nga gidala sa Cebu City Medical Center kinsa naka-angkon og samad pinusilan sa ulo ug tiyan.
Gibutyag ni Police Major Albert Reeves Quiletorio, hepe sa Parian Police Station 1 sa Cebu City Police Office, nga si Benedicto nagpunay og follow-up sa iyang cash bond sa Dasia Security Agency nga gibana-bana nga moabot sa P30,000.
Niadtong Lunes mibalik sa agency aron unta pag-follow up apan wa pa niini makubra ang cash bond tungod kay giproseso pa ang papeles.
Gituohan nga naburyong ang huna-huna ni Benedicto ilabi na nga problema sa panalapi ug buot na sab kining mopa-uli sa Cagayan de Oro City nga maoy iyang kuhaan sa pamilete ang iyang makubra nga cash bond.
Matod pa sa nakasaksi nga nisulod sa kusina si Benedicto, dayon nilahos sa armory diin gihipos ang tanang armas sa agency.
Gani, nagpabuto pa og kaduha kahigayon si Benedicto gamit ang kalibre .38 nga revolver.
Nanawag og pulis ang agency, ug niabot ang mga pulis ug sakop sa team sa Special Weapons and Tactics (Swat).
Inay nga mosurender gipabuthan hinuon niini ang sakop sa Swat hinungdan nga gi-neutralize.
Sa follow-up investigation sa Parian Police Station, ang manager nga Dasia Security Agency nga si Timy Nicor nagkanayon nga ilang gipasabot si Benedicto nga sunod semana nga ma-release ang kuwarta niini, kay padayon pa nga giproseso ang iyang mga dokomento.
Gani, gipasabot nga atol pud nga sunod semana kay adunay sakyanan ang agency nga ibiyahe sa Cagayan de Oro ug mas bintaha nga modungan kini aron nga malibre sa plete sa barko.
Gibutyag ni Quiletorio nga niadtong pang Agosto 18, 2021 miduso sa iyang resignation letter si Benedicto kay buot niya mopauli nalang sa ilang probinsiya aron nga moabag sa iyang pamilya sa pag-uma.
Si Benedicto nagsugod og alagad sa Dasia niadtong tuig 2019.
Si Police Lt. Col. Wilbert Parilla, deputy city director for operation sa CCPO, nagkanayon nga ila sab nga susihon ang security agency pagsuta sab sa ilang mga kakuwangan nga miresulta sa pagka-alburuto sa maong gwardiya.