Nihimo ang Cebu City Government og inventory sa tanang equipment ug properties nga giisyu ngadto sa tanang konsehal labina sa walo nga mokanaug sa pwesto sa Hunyo 30, 2022 human naparot sa miaging eleksiyon sa Mayo 9, diin napupos na ang ilang termino ug napili sa laing posisyon.
Si Rolly Ardoza, hepe sa Department of General Services (DGS), nagkanayon niadtong Mayo 29, nga sila nakapadala na og suwat ngadto sa maong mga konsehal bahin sa inventory sa mga butang.
Sa Hunyo 30, walo ka konsehal ang mobiya sa ilang pwesto aron paghatag og higayon sa mga bag-ong konsehal nga napili.
Sila si Konsehal Alvin Dizon ug Lea Japson wala makadaug sa pag-reelect samtang, si Councilor Niña Mabatid napildi sa pagdagan sa pagkongresista sa Cebu City’s North District.
Ang outgoing councilors mao sila si Eugenio Gabuya ug David Tumulak nga mokanaug human mapupos ang ilang three-term limit sa pwesto sa local government level.
Si Tumulak nikandidato sa pagka mayor apan napildi, naa sa ikatulong pwesto nga nagsunod kang Margot Osmeña, asawa ni kanhi Mayor Tomas Osmeña.
Ang buhatan ni anhing Councilor Raul Alcoseba bakantihan sa iyang substitute ug anak nga lalake nga si Ramonito, napildi sa piniliay.
Samtang, sila si incumbent Councilors Eduardo Rama ug Raymond Garcia magpabilin sa Hunyo 30 human napili sa laing posisyon.
Si Rama nidaog sa pagka kongresita sa south district, samtang si Garcia maoy bag-ong bise mayor sa dakbayan.
Hinuon, ang DGS nipaklaro nga ang inventory dili lang sa tanang outgoing councilors apan maglakip sa tanang sakop sa konseho.
Si Charity Marcos sa Supply Office sa DGS niingon nga kini sa pagseguro sa accountability sa tanang butang ug equipment giluwatan sa city government sa ilang tagsatagsa ka buhatan.
“Kani lang manggawas nga councilors maoy giuna nato kay para naa silay klaro nga turn-over. Pagpada nako og letter for inventory nianang adlawa, nagsugod dayon mi duha ka adlaw human sa eleksyon niadtong Mayo 9,” matod ni Marcos.
Ang DGS niingon nga sa dili pa ang Hunyo 30, 2022, moadto sa ilang mga buhatan aron pagsaksi sa turn-over sa items gikan sa outgoing ngadto sa incoming councilors.