Nanawagan si Bokal Glenn Anthony Soco sa sixto distrito sa Sugbo nga palambuon ang serbisyo sa tanang airline companies nunot sa nagpadayong mga yangungo sa mga pasahero bahin sa delayed flights, kanselado ug overbookings.
Gipasar sa Hunta Probinsyal atol sa sesyon sa Lunes, Septiyembre 25, 2023, ang resolusyon ni Soco nga “Strongly urging airline companies to improve their services amidst numerous passenger complaints on delays, flight cancellations, overbookings, and other flight glitches and disruptions.”
Si Soco nagtuo nga ang ubos nga air transport fare nakaagni sa daghang mga pasahero sa pagpalit sa mga ticket alang sa mas paspas nga pagbiyahe.
Apan gikinahanglan usab nga palambuon sa airline companies ang ilang serbisyo ilabi na nga giingong dili na “luxury” ang pagsakay sa eroplano karon, usa na ka “necessity”.
“Una sa tanan adtong mga ninglabay’ng mga buwan, ni escalate man to ang discussion regarding sa complaints sa mga pasahero regarding sa mga serbisyo sa mga airlines. Mao na nga we are urging airline companies to improve their services,” pagpasabot ni Soco.
“I am doing this aron kanang bill of rights should be clear sa passenger kay og naa na gud ka didto, unya mosakay ka, pananglitan di ka makasakay, wala naka kabalo unsay buhaton nimo, tagaan ba ka og snacks, mag-book ba ka og hotel, refund o unsa and usually kana sa attendant diha sa airport dili sila makatubag,” dugang niya.
Gawas sa maong resolusyon, gipasar usab niini ang laing resolusyon nga nag-awhag sa airline companies nga ipaskin sa mga lugar nga dayag ang Air Passenger Bill of Rights of 2012 ubos sa lagda sa Republic Act No. 776, o ang Civil Aeronautics Act of the Philippines og bisan diha sa sulod sa airport.
Paagi nga mahibalo ang mga pasahero sa ilang katungod, ilabi na kon nabiyaan nga wala matubag ang nagkadaiyang concerns kabahin sa ilang mga flight.
Nanghinaot siya nga hatagan og pagtagad sa airline companies ug airport management ang panawagan, dili lang alang sa mga Sugboanon, lakip na sa mga turista nga mobisita sa Sugbo. (ANV)