KUTOB lang unya sa South Road Properties (SRP) ang mga deboto ug mga dumuduong gikan sa habagatang Sugbo nga magsakay og bus paingon sa siyudad aron maka-apil sa mga kalihukan sa Pista Senyor sa Enero 20.
Kini tungod kay sirhan ang CSBT sugod alas 12:01 sa tungang gabii sa maong adlaw kay sirhan usab ang dalan N. Bacalso, diin mahimutang ang terminal
Ang N. Bacalso kabahin sa rota sa Sinulog, kay assembly area sa mga mag-street dancing ug exit area usab sa mahuman og sayaw sulod sa Cebu City Sports Center.
Gitug-an ni CSBT operations manager Joy Tumulak nga ikalima na karon ka tuig nga anha kutob sa dalan El Pardo o atbang sa Il Corso Lifestyle Mall ang mga bus nga gikan ug paingon sa habagatan ug siyudad sa Sugbo.
Dugang ni Tumulak, duna hinuoy mga jeep nga tugotan nga makahakot sa mga pasahero gikan sa temporaryong terminal paingon sa Mambaling flyover ug sa Basilica Minore del Santo Niño.
“Naay i-release nga special permits ang LTFRB. Hatagan nila ang mga PUJs nga maoy mokuha sa mga pasahero from the temporary terminal sa SRP sa pagka-Januray 20 to Basilica. Anha monaog atubangon sa City Hall. And then, duna puy rota nga mohunong sa may Mambaling flyover vice versa,” niingon si Tumulak.
Paabuton sa CSBT management ang signal sa Cebu City Transportation Office alang sa pagbukas sa dalan N. Bacalso.
Gilantawan hinuon nga maablihan na kini mga alas 8 sa gabii sa Enero 20 gihapon.
Inig abli sa terminal gipadayag ni Tumulak nga limitahan hinuon nila ang mga pasahero nga makasulod. Ang limitasyon ipaha-om sa seating capacity sa mga bus nga mobiyahe.
“Among i-control ang volume sa mga pasahero nga mo-sulod sa Soith Bus Terminal. For example, if mag-open mi’g alas 8 or alas-9, alas-7 pa lang, mag-open na mi sa terminal pero para ra sa pasahero. Seating capacity lang sulod sa South Bus. Once ma-seating capacity na, i-close namo ug balik ang South Bus,” padayag ni Tumulak.
Alang niadtong mga manguli pa sa kalungsuran sa southern Cebu sa Enero 19 o Sabado, bukas pa hinuon ang terminal ug makapabiyahe pa sa mga bus hangtud alas 10 sa gabii.
Inig abot sa alas 12 sa Enero 20, himuon na dayon ang clearing operation sa tanang sakyanan sa CSBT. AZLG