Ordinaryong clean-up drive ang gipahigayon niadtong Dominggo, Oktubre 16, 2022, isip pagpangandam sa Sinulog Festival sa sunod tuig, apan nabutyag na hinuon ang pipila ka mga anomaliya sulod sa Department of General Services impounding ug storage facility sa South Road Properties (SRP).
Nakurat si Cebu City Mayor Michael Rama sa pagkakita sa mga tawo nga nagpuyo sa mga payag sulod sa pasilidad.
Dugang nasuk-an ni Rama human nakita niya ang gatosan ka sakong semento nga migahi na.
Sa Facebook live video ni Ramil Ayuman, secretary on special projects ni Rama, ang mayor niingon nga ang mga ekipo daling makawat ilabi na nga adunay mga tawo nga makasulod-gawas sa lugar.
“Impounding (area) kuno ni. Seguridad lang ang ilang gikinahanglan pero dili ang mga tawo nga nangatulog dinhi,” matod ni Rama.
Ang mayor nimando ni Atty. Collin Rosel, iyahang executive secretary, nga mangulo sa task force nga maoy modumala sa paghawan sa pasilidad sa illegal settlers.
Samtang, niingon si Rama nga idonar sa siyudad ang sinako sa gahi nga semento ngadto sa kabarangayan aron himuong agianan.
Ang pasilidad sa SRP gibutangan og junkyard ug motor pool sa mga dili na magamit.