GIKATAKDANG mahuman ang pagtukod sa stalls sa gatusan ka mga sakop sa Landing Vendors Organization (Lavo) sa dili pa motapos ning buwana.
Kini ang gipahibawo ni Market Administrator Irvin Cabales human nipadayag sa ilang suporta ang mga vendors nga maoy benepisyaryo sa moderno nga stalls sa ambulant vendors.
“Padayon ang contruction sa stalls sa atong ambulant vendors ug wala nay mga kakulian nga nahitabo unlike sa niagi nga adunay pipila ka mga vendors nga nisupak and expected on or before October 30 this month,” matod ni Cabales.
Si Julito Samarita, vice president sa Lavo seaside kauban ang laing 10 nila ka mga sakop kinsa nahimutang sa block 3 nihangop sa pagbag-o sa ilang stalls nga libreng ipagamit sa Cebu2World Development, Inc. , ang nag-renovate sa Unit-II para sa mga legitimate stall holders ug mo-develop sa bag-ong Carbon Market.
Matod sa vice president sa Lavo nga 30 ka tuig nang vendor niingon nga nasabtan nila ang maayong katuyoan sa Cebu City Government sanglit ila na usab nakita ang unang batch sa benepisyaryo nga limpyo, hamugaway ug presentabli pa ang ilang pagpamaligya.
Mao sab ang pamahayag sa ubang vendors kinsa nagtan-aw para sa kalambuan sa ilang panginabuhian.
“Nakaangay mi kay amo nang nakita ang improvement nga nindot kaayo.." padayag ni Sally Tejedor nga 25 ka tuig na nga naninda.
Si Christy Cortez, representante sa mga ilang pundok nga Tingog sa Nagpakabana alang sa pag-Uswag sa Carbon ug dakbayan nisuporta usab sa development sa ML Quezon boulevard sa Ermita.
“Nindot hamugaway na ang mga ambulant vendor. Makatabang gyud ni siya kay kong monindot na ang Carbon, maayo na unya ang among pagpangarga sa mga tinda ug di nami ma slide, di nami makadam-ag og sakyanan ug wala na say lapok ug mga basura nga magkatag., padayag ni Cortez.
Si Cabales niingon nga human unya sa Lavo seaside, nga adunay 300 ka stalls, mo-concentrate na usab sa ilang construction ang C2W paingon ngadto sa Unit-I aron makumpleto ang 544 ka stalls sa mga ambulant vendors.(PAC)