Ang Megawide Construction Corp. nakadawat og bag-ong pag-ila gikan sa Philippine Excellence in Concrete Construction Awards (Pecca) nga gipahigayon sa Marso 30, 2023 alang sa iyang mga bag-ong solusyon sa construction engineering sa Sto. Niño Chapel.
Ang Sto. Nino Chapel nga kabahin sa mga edipisyo alang sa proyekto nga modernisasyon sa 100 ka tuig na nga Carbon Market sa dakbayan sa Sugbo, nakakuha og award sa kategoriya sa Decorative Concrete sa Pecca.
Ang Carbon District Modernization, usa ka joint venture tali sa Megawide subsidiary nga Cebu2World (C2W) ug sa Kagamhanan sa Dakbayan sa Sugbo.
“We are honored to be recognized by Pecca for the fourth time...” matod ni Frederick Tan, Chief Operating Officer sa Megawide’s construction unit.
“It is an honor for Cebu2World to bring Cebu’s deeply rooted heritage to life through the Carbon Modernization project,” paambit ni Lydwena Eco, deputy general manager sa Cebu2World.
Sa katapusang duha ka seremonyas sa PECCA, ang Megawide nakadaug usab sa Best Infrastructure category alang sa Mactan-Cebu International Airport Terminal 2 ug Decorative Concrete category alang sa Paranaque Integrated Terminal Exchange sa 2021; ug Mid-Rise Structures nga kategorya sa Plumera Mactan, usa ka proyekto sa Johndorf Ventures sa 2022.
Ang Sto. Nino Chapel usa ka 378-square meter building sa makasaysayanong downtown area nga nagtanyag og madanihon nga talan-awon sa waterfront ug Cebu-Cordova Link Expressway. Makaakumodar kini og 50 ka mga parokyano.
Ang desinyo sa kapilya inspirado sa porma sa Sto. Niño ug ang samag-balud nga elemento sa atop. Ang paggamit sa reinforced concrete special molds ug form works nakatabang sa malampusong paggamit niini nga materyal.
Ang 30 ka tiil nga Grand Sto. Nino nag-umbaw ibabaw sa kapilya nga nag-atubang sa Mactan Channel.
Ang PECCA giorganisar sa Philippine Constructors Association (PCA) ug sa American Concrete Institute Philippines (ACIP).
Ang award nag-ila sa mga proyekto nga adunay talagsaong paggamit sa kabag-ohan ug teknolohiya, ug alang sa makapadasig nga kahusayan sa tibuok kalibutan nga konkreto nga disenyo ug komunidad sa pagtukod. (RRM gikan sa PR)