Malipayong gipahibalo ni Cebu Archbishop Jose S. Palma nga aprobado na ang Sugbuswak o pagbahin sa artsidyosesis sa Sugbo ngadto sa duha atol sa ika-126 nga National Plenary Assembly sa Catholic Bishops’ Conference of the Philippines (CBCP) nga gipahigayon sa Marzon Hotel sa Kalibo, Aklan, Sabado, Hulyo 8-10, 2023.
Kini ang pamahayag pinaagi sa video ni Palma nga gi-post sa Facebook page sa Roman Catholic Archdiocese of Cebu.
Ang plenary assembly sa CBCP dunay 88 ka aktibong mga obispo sa Pilipinas, 37 ka prelates nga niretiro o ni-resign, ug duha ka diocesan priest administrators ug ipahigayon kini kaduha sa usa ka tuig.
Si Palma maoy nihimo sa presentasyon sa Sugbuswak sa plenaryo.
Sa Enero sa sunod tuig, gipaabot nga usa ka komprehensibo nga bersyon sa division plan sa artsidyosesis ang isumiter ngadto sa Vatican alang sa pagsusi ug pag-aprobar sa Santo Papa.