Nanawagan ang mga lokal nga lider ug magbabalaod sa Sugbo nga mapasar ang Magna Carta for Barangay Health Workers (BHWs) tungod kay kini makapataas sa ilang socio-economic nga kahimtang.
Kapin sa 9,000 ka BHW volunteers sa nagkalain-laing dakbayan ug lungsod sa lalawigan sa Sugbo ang nagtapok niadtong Biyernes, Oktubre 6, 2023 sa pagsaulog sa ilang ika-15 nga anibersaryo isip asosasyon nga gipahigayon sa IC3 Convention Center, Mabolo, Cebu City.
Sila si Senador JV Ejercito ug Cristopher ‘Bong’ Go ug BHW Partylist Representative Angelica Co niadtong Biyernes ningsaad usab ngadto sa liboan ka mga BHW nga ningtambong sa maong kalihukan nga ilang hingusgan ang mga paningkamot sa pagkumbinser sa mga sakop sa 19th Congress nga mapasar ang gisugyot nga House Bill No. 6557.
Matod pa ni Co nga ang mga BHW volunteers gamay og sweldo apan naghinubra ang trabaho.
Samtang ang status sa ilang pagpanarbaho kay gimarkahan lang nga volunteer job, apan ang ilang trabaho pareha ra sa ubang mga nagtrabaho sa healthcare front-liners.
Busa, gihatagan og gibug-aton sa opisyal ang kamahinungdanon sa suporta sa gobyerno sa iyang gihulagway nga bililhon nga mga boluntaryo sa pagserbisyo sa batakang serbisyo sa kahimsog sa matag Pilipino bisan sa layo nga lugar.
Ang mga volunteer kasagaran nakadawat og honorarium matag buwan alang sa ilang trabaho, diin ang mga numero nagdepende sa pinansyal nga kapasidad sa barangay ug sa mga local government units (LGUs), matod ni Co.
Ang Magna Carta for BHWs, usa ka priority measure sa Marcos administration, si Co nagkanayon nga ang accredited BHWs kinahanglang makadawat og insentibo ug benepisyo nga naglakip sa binuwan nga honoraria nga nagkantidad og P3,000, hazard allowance (dili moubos sa P1,000 kada buwan), transportation allowance (P1,000 kada bulan), subsistence allowance (para sa mga pagkaon nga nagkantidad og P100), one-time retirement cash incentive, health benefits, insurance coverage ug mga benepisyo, bakasyon ug maternity leave ug cash gifts.
Ang balaudnon naghatag usab sa usa ka higayon nga gratuity cash incentive nga dili moubos sa P10,000 agi’g pag-ila sa pagkamaunungon ug dedikasyon sa BHW ug sa padayon ug satisfactorily nga pagserbisyo labing menos 15 ka tuig.
PUN-AN
Si Cebu Governor Gwendolyn Garcia nga nitambong sa maong kalihukan, nisaad og dugang P1,000 ngadto sa P5,000 nga Christmas gift sa miaging tuig alang sa BHW gikan sa Cebu Provincial Government.
Misaka kini ngadto sa P6,000 nga pinaskohan nga madawat sa BHW karong umaabot nga holiday season, diin si Garcia niingon nga kini maoy pagpasalamat sa Kapitolyo sa tanan nilang boluntaryong serbisyo nga gihatag ngadto sa kabarangayan.