KINAHANGLAN sundon sa kapulisan sa Negros Oriental, Siquijor ug Bohol ang nahimo sa mga pulis sa dakbayan ug probinsya sa Sugbo.
Kini nga mando giluwat ni Police Regional Office (PRO) 7 Chief P/Brig. Gen. Albert Ignatius Ferro human nga ang kapulisan sa Cebu City ug Cebu Province nakasakmit og illegal drugs nga balor P70.7 million ug nakasikop og 483 ka tawo nga nalambigit sa drugas.
Gipasalig ni Ferro nga kon magmalampuson sila sa ilang kampanya batok sa illegal drugs, hatagan niya kini og pasidungog sama sa makuha sa kapulisan sa dakbayan ug lalawigan sa Sugbo.
Lakip sa iyang gimandoan mao ang Mandaue ug Lapu-Lapu tungod kay aduna pa silay dako nga problema sa illegal drugs.
Una nang mihatag og usa ka buwan nga matod ni Ferro, malampuson nga Synchronized Enhanced Managing of Police Operations (Sempo) sa Cebu City Police Office ug sa Cebu Police Provincial Office tungod kay nakasakmit sila og P70.7 million nga balor sa illegal drugs.
Gimandoan sa director sa PRO 7 ang ubang provincial office nga hingusgan ang ilang kampanya batok drugas.
Ang Cebu City ug Cebu Province nga kapulisan nakasikop og 483 ka tawo diin 344 niini nasikop pinasikad sa warrant of arrest. Niini, 59 ang giilang high value individual sa illegal drugs ug 221 giila nga street level individual.
Apan sa labing unang Sempo sa CCPO ug sa CPPO natagbaw kini sa performance sa duha ka opisyal nga silang Police Colonel Engelbert Soriano sa dakbayan sa Sugbo ug Police Colonel Roderick Mariano sa probinsya.
Tungod kay ang Central Visayas nalibotan sa kadagatan ug daghang mga pantalan nga lisod bantayan, nimando si Ferro nga makig-alayon sa mga lokal nga opisyal aron masusi ang mga pantalan sa kalungsuran ug mga pribadong tugpahanan nga posibling didto ipalusot ang illegal drugs sa mga gagmayng eroplano.
Atol sa iyang pagbisita sa Bohol, nakita niya unsa kalapad ang kabaybayonan niini nga kinahanglan nga mohimo og lakang ang kapulisan aron mabantayan kini. (AYB)