Kapin sa 30,000 ka mga pamilya ang mabalikan sa dili madugay sa ilang suplay sa tubig tungod kay ang mga atabay sa Metropolitan Cebu Water District sa Talamban ug Banilad mapaagas sa duha ka adlaw.
Ang Board of Directors sa MCWD nakahukom nga biyaan ang paghisgot sa ilang regular nga agenda aron tukion kon unsaon sa MCWD pagpagaan sa kahasol sa publiko sa panginahanglanon sa tubig human sa bagyong Odette sa Sugbo sa miaging semana.
Sa BOD meeting kagahapon, Lunes, Disyembre 20, gipahibalo nga ang Visayan Electric (VECO) mipasalig nga ibalik ang kuryente sa tanang atabay sa Talamban ug Banilad karong Miyerkules.
Kini nga mga atabay makahatag og hangtod sa 28,000 cubic meters nga tubig matag adlaw ug magsilbi sa Talamban, Banilad, bahin sa Lahug ug Apas ug pipila ka bahin sa Central Cebu City hangtod sa Fuente area.
Gipahibawo usab sa Veco nga nibalik na ang suplay sa kuryente sa V. Rama Ave nga nagpasabot nga nag-andar na ang atabay sa MCWD sa maong dapit nga naghatag og di mominos 460 cubic meters nga tubig matag adlaw sa mga konsumidor sa duol lakip na sa B. Rodriguez area.
Sa laing bahin, ang Cebu City Government, pinaagi sa paningkamot ni BOD Chairman Jose Daluz III, nisaad nga mopalit og 24 ka units sa generator sets alang sa paggamit sa mga atabay sa MCWD sa dakbayan nga wala pa ma-energize sa Veco.
Ang generator sets gilauman nga mahatag sulod sa semana. Kon mabutang na kini sa mga atabay sa palibot sa Tisa, Talamban, Cabancalan, Lahug ug Banilad, 27,000 cubic meters nga tubig kada adlaw ang mahatag niini.
Sa kasamtangan, ang mga residente sa dakbayan sa Sugbo makakuha og tubig sa lain-laing MCWD fire hydrant sulod sa dakbayan.
Aron mamenosan ang pinansyal nga epekto sa paggamit sa maong mga hydrant ngadto sa MCWD, ang Cebu City Government nigahin og P21 milyones nga ibayad sa tubig nga nahurot. (gikan sa PR)