WA abti og duha ka semana, laing sunog ang niigo sa Barangay Duljo-Fatima, dakbayan sa Sugbo.
Una niadtong adlaw sa Pasko, Disyembre 25, ug sunod niadtong Enero 5, Sabado. Dihay namatay sa ikaduhang sunog, usa sa mga lumolupyo nga ginganlan og Christian Lopez, 43.
Sa sunog niadtong Enero 5, 11 ka panimalay ang naugdaw ug tulo nakan-an sa sunog.
Sigon sa report sa Department of Social Welfare and Services, 32 ka pamilya ug dul-an 128 ka mga tawo ang nawagtangan sa ilang mga panimalay ug mokabat sa P500,000 ang danyos sa sunog niadtong Enero 5.
Ang mga biktima sa sunog niadtong Enero 5 gipabakwit sa gymnasium sa barangay. Pipila kanila ang gikahinabi sa Superbalita Cebu niadtong Dominggo, Enero 6.
Way kalibutan
Si Sofia Lopez, 58, lumulupyo ug tag-iya sa panimalay kung asa nagsugod ang sunog, miingon nga wa silay kalibutan kung unsa o asa nagsugod ang sunog sa ilang panimalay.
“Wa gyud mi kalibutan. Kami tanan dia man mi sa babaw nya wa gyud mi kuryente kay mga one week kapin mi naputlan sa kuryente,” matod niya.
Saysay niya, kalit lang nanimaho og nasunog nga papel sa ilang lugar maong dali-dali nilang gisusi asa gikan.
“Nikalit lang sya og panimaho. Nahibong mi ngano nanimahong plastic, kanang sunog na papel. Unya nidagan akong anak sa ubos, pag-abot niya sa ubos aso naman. Di naman masudlan amoa,” ingon ni Lopez.
Si Dino Illusora, 41, usa sa mga nasunugan, Niingon nga kalit ang maong sunog.
“Gitabang namo didto sa babaw. Gi-clear namo didto nya di naman ma-clear kay kusog naman kaayo ang siga. Wa jud mi nadala maski usa,” matod ni Illusora.
Matod niya, naningahanglan sila og mga hinabang sa pagkakaron.
Mga hinabang
“So far, mga materyales, pinansyal ug mga pagkaon. Among panginabuhi naapektohan man gyud,” sigon niya.
Tungod sa lain sunog nga nahitabo sa Barangay Duljo Fatima, napun-an ang 2,574 ka mga tawo nga apektado sa sunog.
Matod ni Duljo Fatima Barangay Councilor Guian Godofredo, naguol sila sa lain napud nga sunog.
“Usa napud ni kadakong trahedya sa among barangay kay wa pa mi kabangon unya naa napuy laing sunog nga nahitabo,” matod ni Godofredo.
Gihatagan na sa barangay og mga hinabang ang mga nasunogan.
“As of the moment, ilang mga immediate needs ang atoang giatiman usa karon. Kanang mga food packs, bottled water, wa man gyud silay resources ana so mao nang naa ta diri karon para mag apod-apod ug mga relief packs,” matod ni Godofredo kinsa didto sa gym.
Pundo di na igo
Matod niya, maski sa kakuwang sa ilang pundo tungod kay nagamit na kini sa unang sunog nga nahitabo, amdam gihapon sila motabang sa mga biktima sa sunog.
“Atong funds man gud, ato nang (nagamit) sa unang sunog. Mao na, (kaning tabang alang sa mga naapektohan sa ikaduhang sunog) among pangitaan og paagi. Ato pang sutaon kung naa pa ba tay igong pundo nga maka provide pud sa atong mga bag-ong fire victims Basta kami diri sa barangay, kutob sa among mahimo, mabuhat, mao na among ihatag nga suporta sa fire victims. Kutob sa maabot ug mahimo sa barangay,” pasalig ni Godofredo.
Tabangan sa City Hall ang mga biktima sa sunog ug makadawat sila og cash assistance, matod ni Vice Mayor Edgar Labella.
Pakan-on sila sulod sa tulo ka adlaw gikan sa adlaw sa sunog, dugang niya.
Matod ni Duljo-Fatima Barangay Captain Elmer Abella, ilang pangitaan og paagi aron matabangan ang mga nasunogan bisan sa kakuwang og pundo sa ilang barangay.
“Nahurot naman ang kuan, unya na-distribute na namo ang mga bugas, mga delata ngadto sa mga biktima. Mao nay problema namo. Bag-o nasad.
Mangita mig paagi unsay mahimo namo,” matod ni Abella.
Mibisita usab sa mga biktima sa sunog si kanhi AFP chief Ronald “Bato” de la Rosa aron mag- apod-apod ug mga binaldi nga mga bugas ug dlata.
Si de la Rosa molansar pagka-senador sa Mayo 2019.