Hayag nga kaugmaon ang nagpaabot sa usa ka bata nga namatyan og pamilya sa landslide sa Baybay City, Leyte gumikan sa bagyong Agaton sa miaging semana.
Ang 11 anyos nga si Bengielim Donayre, taga Brgy. Cantagnos, naa karon sa Gatchalian Hospital sa Ormoc diin siya gioperahan.
Ang bata maoy bugtong naluwas sa landslide nga nikalas sa kinabuhi sa iyang amahan, inahan ug igsuon.
Si Vincent Paulo Cortes, usa ka inila nga photographer sa Ormoc City, maoy nagsugod sa usa ka donation drive alang sa bata.
“I saw the aftermath sa typhoon, day 1 nag post na ko og promo 50% discount sa wedding package para ma-donate sa victims. P35,000 ang package and 50% lang ila gibayran so that is P17,500. Ang P7,500 gigamit namo sa expenses kay nag volunteer mi as drone operators sa search and rescue,” matod ni Cortes.
Matod ni Cortes, nakit-an sa iyang asawa sa social media ang kahimtang sa bata nga wala nay ginikanan ug padung sa hospital sa Ormoc busa ang sobra nga P10,000 ilang gitagana alang sa bata.
“I was going to donate the money P10k cash sa mga nag donation drive when my wife told me about Bengielim. She told me nga didto na lang nato i-donate kay luoy kaayo na orphan ang bata. She found out sad na padung og Gatchalian hospital ang bata,” matod ni Cortes.
Usa sa ningtabang kang Cortes ang iyang higala sa hospital nga si nurse Mikay Fajardo kay dili kaya ni Cortes makig-atubang sa bata tungod sa kaluoy.
Gi-post ni Cortes ang sitwasyon sa bata sa social media ug wala damha nga sunodsunod ang nipaabot og tabang.
“From students to professionals over 500 donors. Gikan sa P2.33 hantud sa P10K kada individual,” matod ni Cortes.
Niabot sa P262,941.56 ang natigom nga donasyon alang sa bata ug nabayran ang iyang P50,000 nga partial bill sa hospital.
“Naoperahan siya adtong April 15. Birthday mismo niya. Mga doctors sa Gatchalian wala nagpabayad. Ang Rotary Club of Ormoc nag donate sa device kato gi implant sa iya tiil worth P25,000,” dugang ni Cortes.
Gawas sa tabang pinansyal, duna usay naghatag og gadget sa bata ug mga regalo atol sa iyang birthday.
Gani, ang STI College of Ormoc, naghatag usab og scholarship alang sa bata sugod sa Grade 11.
“Naa sad ko amigo from Cebu nga mo-sponsor sa iya college unta either mag pilot siya or med school, including living expenses,” matod ni Cortes.
Tan-awon pa usab ni Cortes ug sa iyang mga kauban unsa pay ilang matabang inig gawas sa bata sa tambalanan labi na sa pag-eskwela.
“After this, if makagawas na ang bata. We will plan kon unsa pa matabang namo sa bata. Kay moeskwela paman ni grade 6 hantud grade 10 kay grade 11 paman sugod iyang scholarship,” matod ni Cortes.
Sa pagka karon, medyo stable na ang kondisyon sa bata apan gilikayan lang usa nga hisgutan ang hitabo gumikan sa trauma.
Ang iyaan lang ang nagbantay kaniya sa tambalanan.
“Naa siya guardian karon iya tita igsuon sa iya mama. 24/7 naa permi ga bantay. Buotan pud kaayo and never once nangutana about sa kwarta,” matod ni Cortes.