Mahimo na nga mopalit ug motilaw sa nagkadaiyang delicacies ug produkto gikan sa mga lokalidad sa probinsya sa Sugbo sa usa lang ka lugar.
Kini human pormal na nga gibuksan qng Tabo sa Kapitolyo sa Agusto 1, 2023 subay sa pagsugod sa month-long celebration sa founding anniversary sa lalawigan sa Sugbo.
Ang Tabo makit-an sa Capitol compound duol sa Administrative Building.
Gihatagan og usa ka semana o kutob Agusto 6, ang mga manindahay ug mag-uuma nga makapamaligya sa ilang ani ug gipasigarbong mga produkto.
Lakip sa gipasundayag mao ang mga presko nga prutas, utanon, exotic seafood ug delicacy gikan sa lainlaing munisipyo ug component cities.
Gawas sa mga nauna na nga kalihukan, gipaabot usab ang State of the Province Address sa Agusto 11, ug ang Pasigarbo sa Sugbo sa Agusto 27, nga ipahigayon sa dakbayan sa Carcar. (ANV)