Gipaabot ang dakong pakunhod sa presyo sa mga produkto ugma, Marso 22, nga gikatahong halos motupong sa dakong umento sa miaging semana.
Apan nipasidaan ang International Energy Agency (IEA) nga temporaryo lang kini human ang kalibotanong supply sa lana apektado sa paghunong sa lana gikan sa Russia sa pag-abot sa merkado tungod sa sanctions nga gipahamtang sa kanasoran sa Kasadpan ug Uropa tungod sa iyang pag-ataki sa Ukraine.
Sa unang higayon, ang mga motorista makasinati og pagkunhod sa presyo sa lana ning tuiga nga moabot og P11.70 sa diesel ug P6.25 sa gasolina matag litro subay sa pagbanabana sa lokal nga oil companies sa Sabado, Marso 19.
Ang kerosene, sagad gigamit sa pagluto, moubos og P8.75 matag litro.
Ang mga aspeto nga makaapekto sa presyo sa lana mao ang buhis ug ubang palaliton sa petroleum imports, foreign exchange rate fluctuations ug biofuel components nga isagol sa diesel ug gasolina.
Ang IEA nibanabana niadtong Biyernes, Marso 18, nga tulo ka million barrels matag adaw gikan sa Russian oil ang nawala.
Naglaum ang IEA nga ang nagpadayong sabotsabot sa kalinaw tali sa Russia ug Ukraine dunay positibo nga resulta, kini mopabalik sa presyo sa lana og kapin sa $100 per barrel.
Ang IEA usa ka autonomous intergovernmental organization ug nagsilbi isip information source bahin sa oil market, nga makatabang sa lakang sa matag nasod sa paghimo og lakang sa pagkabalda sa global oil supply sa lana.
AYUDA
Usa sa tubag sa kagamhanan sa Pilipinas mao ang paghatag og ayuda sa public transportation.
Ang P569 million nga balor sa fuel subsidies alang sa mga drayber sa public utility vehicles (PUVs) nasulod na sa state-owned Land Bank of the Philippines (LBP.
Kini nakabenepisyo sa 87,500 jeepney drivers uban sa P6,500 matag usa, sumala sa Landbank. (RRM, Wires)