Di na madugay makabaton na og kaugalingong Special Weapons and Tactics (Swat) personnel ang Dakbayan sa Talisay.
Dili mominos 16 ka mga pulis sa Talisay ang mopaubos sa pagbansaybansay sulod sa duha ka buwan sa dili pa sila mahimong hingpit nga sakop sa Swat.
Patas silang bahinon sa duha ka teams. Ang gitawag nga elite personnel sa hut-ong sa Philippine National Police (PNP) maoy magsilbing back-up team sa mga local police unit atol sa police operations.
May katakus usab sila sa pagdumala sa mga insidente sama sa hulga sa bomba sanglit kabahin kini sa ilang pagbansay.
Si Lieutenant Colonel Randy Caballes, hepe sa Talisay City Police Station, niingon nga hinaot nga karong tuiga, masugdan na nila ang pagbansaybansay sa mga piniling pulis.
Ang pagbansaybansay gipundohan sa City Government pinaagi ni Mayor Gerald Anthony “Samsam” Gullas.
Ang mga gamit sa pagpanalipod sa mga miyembro sa Swat gilakip usab sa budget.
“Na-release na ang budget. Naghuwat na lang ta sa approval sa Camp Crame bag-o ta magsugod sa training,” matod ni Caballes. Dugang niya nga importante gyud ang presensya sa mga sakop sa Swat sa naglambo nga dakbayan sama sa Talisay.
“Swat personnel are really important based on their skills, especially in Talisay City, we really need the Swat team for any contingencies that require their skills,” matod ni Caballes. (BBT, TPT)