Gitinguha sa bag-ong warden sa Talisay City Jail nga si Jail Superintendent Richard Tolabing nga mahimong “drug-free facility” ang ilang pasilidad nga nahimutang sa Barangay Maghaway, siyudad sa Talisay.
Sumala pa ni Tolabing nga ilang paningkamutan nga makab-ot ang maong tinguha ubos sa iyang pagpangatungdanan, ilabi na ang ang city jail nahimo nga awardee sa Department of Health (DOH).
Kini human nasuta nga sulod sa pasilidad wala nay nanigarilyo o namaligya og sigarilyo.
Ang Talisay City Jail dunay 1,300 ka mga piniriso, 90 porsiyento niini adunay giatubang nga kasong ilegal nga drugas samtang nahabilin nga 10% porsiyento gibahin sa uban pa nga nagkadaiyang mga kaso.
Gitinguha sab ni Tolabing nga kahatagan og livelihood program ang mga binilanggo nga nakagawas na.
Si Tolabing pormal nga milingkod isip bag-ong warden sa Talisay City Jail sayo ning semanaha.