FILE PHOTO
FILE PHOTO

Talisay maghimo og 2 ka artificial islands

Ang Dakbayan sa Talisay nagplano sa paghimo og duha ka artipisyal nga mga isla duol sa kabaybayunan niini aron madani ug ma-accommodate ang potensyal nga investors, matod sa zoning officer sa Dakbayan.

Si Engineer Dandi Capistrano, City of Talisay Planning Development Officer, nitug-an sa SunStar Cebu sa pakighinabi niadtong Miyerkules, Hunyo 21, 2023, nga ang Siyudad nanginahanglan og dugang yuta alang sa umaabot nga kalambuan, sanglit kadaghanan sa teritoryo niini urbanized na samtang ang kabukiran gikonsiderar nga protektadong mga lugar.

“Daghan mosulod og negosyo sa Talisay apan walay land resources ika offer, labi na sa ektarya ang land requirements sa mga investor,” matod ni Capistrano.

Ni-contact ang SunStar Cebu kang Talisay City Mayor Gerald Anthony “Samsam” Gullas niadtong Miyerkules alang sa mga komento, apan ang opisyal wala nitubag sa text message ug wala usab nitubag sa mga tawag sa telepono hangtod sa oras sa pagsuwat.

Gipasabot ni Capistrano nga kining duha ka mga isla, sa dili madugay, mag-host sa mga negusyo, industriya, ug condominiums nga makapausbaw sa ekonomiya ug makamugna og trabaho alang sa katawhan sa dakbayan sa Talisay kon mahuman na kini.

Tukoron ang taytayan nga magdugtong sa artipisyal nga mga isla gikan sa mainland, matod ni Capistrano.

Matod usab niya nga kining maong plano mamahimong Public-Private Partnership (PPP) project ug nangita pa ang Dakbayan og investors nga maoy mopalambo sa maong mga isla.

Subay sa datus sa Department of Environment and Natural Resources (DENR 7), ang Dakbayan sa Talisay adunay kinatibuk-ang gilapdon sa yuta nga mga 7,515.61 ka ektarya, diin 4,880 ang giprotektahan nga mga yuta sa kalasangan.

Ang Talisay usa ka component city sa lalawigan sa Sugbo nga adunay 22 ka mga barangay.

Related Stories

No stories found.
SunStar Publishing Inc.
www.sunstar.com.ph