HEPE sa tanod sa usa ka barangay sa lungsod sa Balamban nga kanunay makit-ang magdala og tag-as nga armas bisan way lisensya, nasikop sa ronda sa kapulisan sa Sabado sa alas 5:10 sa buntag, Disyembre 12, 2020 sa iyang balay sa Sitio Checkpoint, Brgy. Lamesa ning lungsod.
High-powered nga mga armas nakuha sa Provincial Field Unit sa Criminal Investigation and Detection Group gikan sa suspek nga giilang si Frudencio Baculi, Jr., 51, minyo, negusyante, hepe sa tanod sa Barangay Lamesa.
Ang joint operation tali sa CIDG ug Balamban Police Station gipasikad sa search warrant nga giluwatan ni Toledo City Regional Trial Court (RTC) Branch 27 Executive Judge Ruben Altubar. Kini gipetsahan og Disyembre 10, 2020.
Nakuha gikan kang Baculi ang usa ka M16 Armalite rifle, usa ka magazine niini, 29 ka mga bala; usa ka Carbine rifle, usa ka magazine nga dunay 11 ka mga bala niini; usa ka box sa 14 ka mga bala sa kalibre .45 nga pistola; usa ka KG9 submachine pistol ug duha ka mga bala; usa ka bala sa .40 caliber nga armas; ug usa ka hand grenade.
Si Police Lieutenant Colonel Arniel Huesca, chief sa CIDG7-PFU, nangulo sa operasyon ug nahinabi sa Sun Star Superbalita Cebu, nagkanayon nga nakadawat silag report kabahin sa pagsigeg dalag tag-as nga armas ni Baculi nga dunay mga kuyog nga tanod.
Ilang gisusi sa Firearms and Explosives sa Camp Crame kon duna bay mga lisensya, apan ilang nasuta nga wala.
Busa, ila kining gipanid-an ug human makompirmar, ni-apply sila si Huesca og search warrant.
“Ang reklamo nga among nadawat kining sige niyag Rambo, mag-roving daw dunay mga kauban, mahadlok mga residente,” dugang ni Huesca. Atol sa imbentaryo sa armas, ang mga konsehal sa barangay ningsaksi, apan wa ang barangay kapitan.
Nanghimakak si Baculi nga iyaha ang armas, kay ang tag-iya usa ka barangay official.
Apan si Huesca nipasabot nga manubag si Baculi kay siya ang naa sa search warrant ug nakuha gikan sa iyang balay ang mga armas. (GPL)