USA ka computer technician ang gipusil patay sa wala pa mailhing mamuno sa Barangay Mohon, siyudad sa Talisay karung Lunes sa hapon, Mayo 6.
Nailhan ang maong biktima nga si Junwill Sigue, 47 anyos, residente sa Sitio Mohon Proper.
Usa ka saksi ang nibutyag sa Superbalita Cebu nga nakigstorya pa siya sa biktima sa maong dapit mga pasado alas 4 sa hapon sa dihang giduol kini ug gipusil sa usa ka wala mailhing lalaki.
Matud pa sa saksi, ang suspetsado kuyog sa usa ka wala sad mailhing babae sa wala pa gipusil si Sigue.
Paghuman niini ug pusil patay ni Sigue, gitionan sad ang saksi sa maong suspetsado pero wala na kini nidayon ug pusil ug nikaratil na ug dagan padulong sa main highway.
Gisusi pa sa kapulisan kung unsa ang motibo ug kinsa ang posibleng suspetsado sa pagpatay ni Sigue.