Usa lang ang nasignit sa kapulisan sa pagronda sa tigbakayan sa Sityo Bato, Barangay Santa Cruz, lungsod sa Calape, Bohol niadtong Sabado, Pebrero 5, pasado alas 5:00 sa hapon.
Si Police Senior Master Sergeant Angelo Namang sa Calape Police Station sa Bohol Provincial Police Office (BPPO), nibutyag nga niresponde ang iyang mga kauban sa nahisgutang lugar human nakadawat og tawag ang ilang hepe kalabot na sa illegal nga tigbakay.
Sa pag-abot sa kapulisan sa dapit, nagkatibuwaag og panagan ang mga sugarol apan wala makaipsot si Ed Anthony Carakut, 32, ug molupyo sa nahisgutang lugar.
Matod ni Namang, si Carakut naabtan nga naggunit og manok-igtatari.
Atol sa maong ronda, dunay duha ka manok bihag ang naimbargo, mga buwang ug P300 nga gipusta sa tigbakay.
Si Carakit mag-atubang og kaso nga kalapasan sa Presidential Decree 1602 nga gikatakda nga isang-at sa kapulisan batok niya.
Ang BPPO aktibo sa ilang kampanya batok sa tanang matang sa illegal nga sugal subay sa mando sa Camp Crame.