OPISYAL na nga gideklarar ang panahon sa ting-init sa Biyernes, Marso 22.
Ala 1 sa hapon sa Biyernes dihang opisyal na nga gideklarar nga nawagtang na ang Northeast Moonsoon o Amihan diin mao ang timailhan nga dry season na.
Tungod niini, mas init pa ang masinati sa publiko hilabi na nga anaa ang El Niño Phenomenon.
“The ongoing weak El Nino affecting large areas of the country may result in prolonged dry spell & hotter air temperature in the coming months,” matod sa Pagasa.
Giabisohan ang publiko nga di magpalabi og painit ug di mag-usik-usik sa tubig ug magdaginot.
Ang kainit sa panahon maoy gibasol sa mga kaso sa fish kill dinhi sa Sugbo.
Pipila ka mga dapit nga dunay industriya sa isda ang naapektuhan og maayo, sama sa dakbayan sa Carcar.
Liboan ka mga tilapia ang nangamatay tungod sa kainit sa tubig ug hinayhinay nga paghubas.