Compostela, Davao De Oro - Pamilya sa tinun-an sa Criminology, kansang nawong brutal nga giatake sa wala mailhing mga tawo sa Brgy. Poblacion, alas 2 sa kaadlawon niadtong Sabado, Septiyembre 16, 2023, nangayo og dinaliang hustisya.
Kini ang gibutyag gikan kang Jade Labiste, suod nga higala sa biktima nga si Jhon Lester Alibangbang, tinun-an sa Criminology sa usa ka pribadong tunghaan sa maong lungsod.
Siya taga Brgy. Naboc, Monkayo, Davao de Oro.
Si Labiste, sa pakighinabi sa Superbalita Davao, nibutyag nga kauban nila si Alibangbang, uban ang laing higala nga giilang si Denmark Ugsan, niadtong higayuna.
Si Ugsan mibisita ug nagtan-aw sa usa ka kalihukan sa Brgy. Poblacion sa usa ka pasundayag sa usa ka Taylor Swift impersonator nga ginganlag Maya Sympha.
Wa silay tuyo nga mobiya dayon kay mihunong sila aron pagtan-aw sa kalihukan. Dugang pa, ilang nahimamat ang tulo ka mga miyembro sa lesbian, gay, bisexual, and transgender (LGBT) community ug ni-escort sila niini sa boarding house nga ilang gipuy-an.
HAPAK
Sa giasoy ni Labiste, human luwas nga gipakanaog ang ilang mga higala nga LGBT, nipadayon sila sa gi-parkingan sa ilang motorsiklo.
Sa wala damha, si Labiste gidasmagan gikan sa luyo sa tulo ka mga lalaki nga sakay sa laing motorsiklo nga daling misibat palayo sa dapit.
Nunot niining makahahadlok nga hitabo, daling namalik ang ilang mga higala sa ilang tagsa-tagsa ka boarding house, diin si Ugsan maoy unang gipakanaog sa iyang dapit.
Ang mga taho nagpakita nga sa pag-abot sa boarding house ni Ugsan, si Labiste mikuyog sa iyang higala paingon sa gate samtang si Alibangbang naghulat daplin sa dalan uban sa iyang motorsiklo.
Apan, ang samang tulo ka mga lalaki nga sakay sa usa ka motorsiklo nipatim-aw ug nidasmag kang Labiste.
Ang mga suspek, gihulagway nga nagpangidaron og 20 anyos pataas, nagsul-ob og luag nga sapot, ug ang usa walay sinina.
Si Labiste niasoy nga iyang nasaksihan ang usa sa mga suspek nga nagbitbit og bato ug bangis nga nibunal sa ulo ni Alibangbang sa makausa una pa niikyas sakay sa ilang motorsiklo.
Sa pag-abot sa usa ka ambulansya, ang mga polis anaa na, uban sa panon sa mga nanan-aw. Sa kakurat, ang tulo ka mga suspek didto pa sa lugar nga naglingkod sa ilang motorsiklo.
Si Labiste nipahibawo dayon sa kapolisan ug gigukod ang mga suspek, apan wa na maabti.
Sa pinaka-ulahing update, ang biktima nagpabilin sa talandugon nga kahimtang sa tambalanan, nga nakaangkon og grabe nga samad sa ulo ug buak sa bagolbagol. / DTV sa SunStar Davao