Ang ika-siyam nga puwesto sa bag-ohay lang nga Licensure Examination for Teachers (LET) alang sa Bachelor of Elementary Education (BEED) nakuha sa graduwado sa Mandaue City College (MCC).
Si Mandaue City Mayor Jonas Cortes nagkanayon niadtong Miyerkules, Disyembre 21, 2022, nga ilang hatagan si Sheryl Etorma og bisan unsang posisyon sa gobyerno sa City Hall o patudluon sa MCC.
Si Etorma migradwar nga magna cum laude gikan sa MCC niadtong Enero 2022.
Sa bag-ohay lang nga BEED-LET, niranggo usab siya sa ikasiyam nga adunay average nga 92.80 porsyento. Siya ang labing una nga LET topnotcher sa MCC.
Gipasalamatan usab siya ni Cortes sa paghatag og garbo sa Mandaue City ug nahimong inspirasyon sa iyang mga kaubang MCC ug mga tinun-an sa edukasyon.
“Na-appreciate gyud nako ang offer ni Mayor nga gi-recognize niya akong achievement...Feel nako nga naapil sad kos Mandaue City College,” matud ni Etorma.
Si Etorma niingon nga siya anaa pa sa cloud nine alang sa iyang bag-o nga kalampusan ug sa gihapon naghunahuna nga kini dili katuohan.
Matud niya nga double blessing kini alang kaniya tungod kay ang 37-anyos nga topnotcher hapit na magpakasal sa iyang uyab.
Giasoy usab niya ang iyang mga pakigbisog samtang nagtuon sa MCC kay siya nagtrabaho sa samang higayon aron masuportahan ang iyang pamilya.
“Sa dihang namatay ang akong amahan, ako ang nahimong breadwinner kay kamagulangan sa lima ka magsuon. Kinahanglang unahon nako nga makagradwar ang akong mga igsuon sa eskuylahan sa dili pa ko makatapos sa akong pagtuon,” asoy ni Etorma.