Mga tinun-an sa high school nga mangaligo unta sa dagat, sa hospital nisangko human nabangga sa poste sa Sabado sa alas 3:30 kaadlawon, Mayo 6, 2023, ang ilang gisakyan nga trak sa National Highway, Brgy. Magay, lungsod sa Compostela, amihanang Sugbo.
Ang Bongo dropside Porter (JAD 5768), nga gimaniho ni Randy Villar, 44, minyo, taga Brgy. Kalunasan, dakbayan sa Sugbo, guba kaayo tungod sa impact.
Si Villar usa sa mga nangaangol.
Ang 10 ka mga tinun-an nga nangaangol, uban kanila nangalabay gikan sa gisakyan, daling gipangdala sa Danao City Provincial Hospital.
Si Police Captain Kelvin Roy Mamaradlo, hepe sa Compostela Police Station nga nahinabi sa Superbalita Cebu, nagkanayon nga ang mga biktima pulos mga tinun-an sa Regino Mercado National High School sa Brgy. Pahina Central, dakbayan sa Sugbo nga nag-outing pinaagi unta sa pagpangaligo sa dagat sa lungsod sa Medellin, amihanang Sugbo.
Usa kanila magsaulog usab unta sa iyang birthday kuyog ang mga classmate ug barkada.
Sakay ang 25 ka mga estudyante niadtong higayuna.
Si Mamaradlo niingon nga si Villar nitug-an kanila nga samtang nagsubay sila sa national highway sa Brgy, Magay, kalit nga nibuto ang atubangan nga ligid sa tuong bahin sa sakyanan.
Tungod niini, nawad-an siya sa kontrol sa manubela, iyang gibangga sa poste sa kuryente ang sakyanan.
Tungod sa kakusog sa impact, nangalagpot ang mga biktima ug maayong pagkabali sa poste hinungdan sa grabing kadaot sa sakyanan.
Ang 10 ka mga biktima nga medyo grabe og angol, uban sa driver, gidali sa pagdala sa tambalanan sa Danao city.
Sumala ni Mamaradlo nga dili hubog ang driver ug disgrasya ang nahitabo.
Matod niya nga ang lugar makadaghan na naaksidentihan tungod kay tul-id ang dan ug kon kaadlawon, sagad sa mga sakyanan kusog nga makapadagan.
Nipahimangno siya sa mga motorista nga mag-amping kanunay sa ilang pagmaniho. (GPL)